Fin plan estratéxico 2015-2019

Pechamos hoxe o noso plan estratéxico 2015-2019 coa celebración dunha reunión dos nosos patróns e patroas na sede de Vigo, que pon fin a este período de xestión e co que iniciamos unha nova etapa de consolidación do proxecto emprendido hai cinco anos. Situámonos neste tempo como primeira fundación galega nos nosos ámbitos de actuación pola nosa repercusión tanto no tecido social como cultural da comunidade, que acada actualmente o 48 % dos concellos, con máis dun millón trescentas mil persoas beneficiarias, o que representa un crecemento do 61 %.

Durante este período, e grazas ao compromiso de ABANCA e a súa achega de preto de 50 millóns de euros como mecenas único, transformámonos de xeito integral, superando as metas inicialmente fixadas no plan estratéxico 2015-2019, destinando 132 millóns de euros ao cumprimento dos nosos fins fundacionais. O mecenado transformador de ABANCA foi fundamental para a nosa sostibilidade, así como para o incremento da intensidade, calidade e alcance das nosas actuacións.

Somos hoxe unha organización eficiente, autosostible e anovadora, profundamente comprometida coa igualdade de xénero, o 55,40 % do noso capital humano son mulleres e conforman o 76,47 % dos postos directivos. «O noso compromiso é continuar ese camiño común cara a unha fundación 5.0, sustentada sobre os principios da sostibilidade do medio ambiente, comprometida socialmente, anovadora e con visión nacional e internacional, ao servizo de toda a sociedade galega. No peche deste plan estratéxico e ao enfrontarmos a nova planificación para o seguinte período de aplicación, continuamos desde hoxe, pensando en futuro, poñendo a nosa vontade, ilusión e recursos», subliña Miguel Ángel Escotet, presidente de Afundación.

Ver vídeo resumo