Centros Afundación

Agalería é un espazo virtual acristalado, unha recreación con tecnoloxía 3D, que permite ao visitante integrarse na contorna natural no que se sitúa.

O edificio, sede do Padroado de Afundación, é un proxecto do arquitecto británico Nicholas Grimshaw. Achega unha obra vangardista ao patrimonio arquitectónico da cidade e de Galicia.

O edificio, sede da Xerencia de Afundación, foi proxectado en 1879 polo arquitecto Jenaro de la Fuente Domínguez. De estilo eclecticista, loce un virtuoso traballo de cantería e presenta dúas fachadas enlazadas por un chafrán, resaltado con miradoiros de fundición.

A Sede Afundación Pontevedra foi redeseñada polo arquitecto pontevedrés César Portela cunha filosofía de combinar a tradición formal do inmoble coa estética do século XXI, dotándoo dunhas instalacións innovadoras acordes aos seus novos usos sociais. 

Entradas en Ataquilla.com 

A Sede Afundación de Ourense está situada nun dos edificios máis representativos do modernismo galego, deseñado polo arquitecto Daniel Vázquez Gulías.

A Sede Afundación de Lugo é un edificio multifuncional, concibido co fin de que os seus espazos poidan ser tamén utilizados por entidades públicas e privadas, así como por organizacións non gobernamentais que desempeñen actividades acordes á nosa filosofía.

O edificio denominado Casa Grande do Pozo está incluído no catálogo de Protección do Patrimonio Construído de Interese Cultural do Concello de Santiago de Compostela. Pertenceu ao cabido entre os séculos XV e XIX, era moi apreciado por albergar no seu interior un pozo que alimentaba as fontes públicas da cidade. No ano 1895 o arquitecto Manuel Pereiro Caeiro realizou unha importante reforma no inmoble. 

Nas catro plantas que ocupa a Sede Afundación Ferrol sitúanse, ademais do salón de actos equipado cos últimos avances tecnolóxicos, diversas salas para acoller exposicións, cursos, obradoiros, faladoiros e todo tipo de actos culturais e sociais.

Inaugurado en 2011, o Pazo de Ramirás acolle agora un auditorio que respecta a antiga fisonomía do edificio en pleno casco histórico compostelán.

A última rehabilitación do Café Moderno Afundación foi dirixida polo arquitecto portugués Álvaro Siza. O edificio alberga un encantador café e conserva interesantes pinturas, obra de destacados artistas galegos da primeira metade do século XX, como Monteserín, Pintos Fonseca, Carlos Sobrino ou Laxeiro. 

Trátase dunha construción de finais do século XVII ideal para a celebración de reunións, xornadas, xantares e ceas, cursos e conferencias. O Pazo de San Roque está dotado dos máis modernos medios tecnolóxicos e audiovisuais, acceso a internet, canón de vídeo, videoconferencia e acondicionámolo para a realización de diversas e variadas actividades sociais e culturais. 

A Sala de exposicións Afundación en Ourense trátase dunha xoia arquitectónica situada en pleno barrio histórico, que reformamos totalmente no seu interior para transformalo nun innovador edificio de espazos diáfanos e liñas modernas, conservando por completo a súa fachada tradicional, de gran valor artístico.

Situado en pleno corazón da cidade de Vigo, o Teatro Afundación inaugúrase en 1984. Trátase dunha obra de recuperación de patrimonio histórico sobre o magnífico teatro García Barbón, que o arquitecto Antonio Palacios proxectara a principios do século XX. 

Entradas para o Teatro Afundación Vigo en Ataquilla.com

No Centro de Formación Profesional Afundación da Coruña impártense catro ciclos de grao superior: Administración e Finanzas, Desenvolvemento de Aplicacións Multiplataforma, Asistencia á Dirección e Desenvolvemento de Aplicacións Web.

A Escola Infantil Zalaeta é froito dun convenio de colaboración entre o Concello da Coruña e Afundación.

Todo o persoal que atende os nenos/as é especialista en Educación Infantil e posúe titulación superior.

Especializada en literatura infantil e xuvenil, conta con toda a produción deste eido publicada en lingua galega ata o momento. Ofrécense servizos de información bibliográfica, guías de lectura e préstamo de libros e audiovisuais. O fondo actual é de 19 000 libros e 700 DVDs.

A Residencia de Estudantes de Afundación ofrece aloxamento a todas aquelas persoas matriculadas nalgunha facultade, escola universitaria ou centro de formación profesional do Campus de Pontevedra. Os estudantes dispoñen de servizo de aloxamento con pensión completa, servizo de limpeza tres veces por semana e conexión wifi. Ademais, nela organízanse todo tipo de actividades culturais, científicas e deportivas. 

No Colexio Fogar Afundación impártense seis ciclos de grao medio: Preimpresión Dixital, Impresión en Artes Gráficas, Soldadura e Caldeirería, Mecanizado, Instalacións Eléctricas e Automáticas e Instalacións de Telecomunicacións. E tres ciclos de grao superior: Programación da Produción en Fabricación Mecánica, Automatización e Robótica Industrial e Mantemento Electrónico.

Tamén se ofrecen cursos formativos de reciclaxe para traballadores en activo.

Situada no Teatro Afundación de Vigo, esta biblioteca conta con máis de 31.000 monografías impresas e servizo de hemeroteca (revistas e prensa). É de acceso libre e ofrece servizo de consulta en sala, préstamo e conexión wifi.

O obxectivo do centro Naturnova é reflexionar sobre a conservación e mellora da nosa contorna e a importancia de evitar a súa degradación, analizando os problemas do noso planeta e fomentando a implicación da cidadanía na procura de solucións.

O Espazo +60 Afundación da Coruña conta con máis de 3000 persoas socias. Situado no centro da cidade, poderás atopar nel unha variada oferta de actividades que renovamos periodicamente.

O Espazo +60 de Betanzos atópase situado nun contorno privilexiado, na antiga capela de San Roque do século XVII, en pleno centro de Betanzos.

No noso Espazo +60 de Ferrol poderás gozar dun completo programa de actividades que renovamos cada ano.

O noso Espazo +60 de Pontedeume, inaugurado en 1977 e reformado en 2003, conta con máis de 25 anos de traxectoria. Trátase dun edificio de tres plantas accesible a persoas con mobilidade reducida.

No Espazo +60 de Santiago de Compostela fomentamos a participación e o protagonismo social das persoas maiores de 55 anos. Cada ano renóvase cun completo e variado programa de actividades. 

Desde 1965 o Espazo +60 de Lugo dinamiza a vida sociocultural dos maiores lucenses ofrecéndolles multitude de actividades para unha vida máis activa e participativa.

O Espazo +60 de Monforte de Lemos está situado nunha antiga casa de finais do século XIX dotado dunhas modernas instalacións tras a súa restauración.

Máis de 3000 persoas maiores da Mariña lucense son as protagonistas das actividades socioculturais que organiza o Espazo +60 de Viveiro.

O noso Espazo +60 de Ourense, ubicado en pleno centro da cidade, foi pioneiro ao ofrecer novidosos servizos e actividades aos seus asociad@s. Inaugurado en 1982, dispón de 4 andares con ascensor e sen barreiras arquitectónicas.

O Espazo +60 de Pontevedra está situado no antigo Café Moderno, un edificio con decoración modernista que continúa a ser un referente da actividade social pontevedresa.

O Espazo +60 de Vigo está situado na Sede de Afundación na cidade. Cada ano renovamos a nosa oferta de actividades para adaptalas ás necesidades das persoas socias.

O Monte de Piedade é o único operativo hoxe en Galicia que concede préstamos persoais, deixando como garantía xoias ou alfaias que quedan empeñadas e en depósito ata a cancelación dos préstamos. O cliente pode recuperar a xoia, así a operación non supón unha diminución do seu patrimonio persoal, unha característica que o diferencia das restantes opcións de venda de xoias.