Programas Espazos+60

En Afundación, a través da oferta dos nosos Espazos +60, nos que contamos actualmente con máis de 14 000 persoas socias, acompañamos as persoas maiores no seu percorrido vital, ofrecendo propostas e oportunidades para mellorar a súa calidade de vida e benestar, por medio de actividades grupais relacionadas con hábitos saudables, aprendizaxe, formación en cultura dixital, lecer activo, actividades interxeracionais ou voluntariado.

A maior lonxevidade, a heteroxeneidade e os novos perfís de persoas que chegan á etapa da xubilación, con estilos de vida máis activos e independentes, lévannos a innovar continuamente nas nosas propostas, contando para iso coa súa participación directa para adecuarnos ás súas necesidades e expectativas.

Co fin de medir a eficacia dos nosos programas, Afundación e a Universidade de Santiago realizamos unha investigación en 2017, usando o Índice Persoal de Envellecemento Activo (Marsillas, 2016), a primeira ferramenta que permite a avaliación e cuantificación do envellecemento activo dunha persoa. As conclusións desta investigación servíronnos para estruturar a nosa oferta en diferentes dimensións e identificar áreas de traballo que requiren un maior desenvolvemento, como é o caso da educación emocional, para favorecer a mellora da calidade de vida das persoas a medida que envellecemos.

A difusión dunha imaxe social dos maiores afastada de estereotipos, dando visibilidade a persoas reais e diversas, e a divulgación do coñecemento e boas prácticas no ámbito do envellecemento activo forman parte igualmente dos nosos obxectivos.

Afundación, a Obra Social de ABANCA, porá en marcha a partir da próxima semana un novo programa de acompañamento para persoas maiores de 60 anos, co obxectivo de dar apoio e proporcionar ferramentas que lles axuden a xestionar as novas situacións xurdidas polo impacto da pandemia. O programa, que será gratuíto, deseñouse a partir dunha experiencia piloto desenvolta desde o mes de xaneiro entre 700 persoas socias dos Espazos+60 de Afundación para coñecer o cambio nas súas necesidades e inquietudes no novo contexto social.

As necesidades de aprendizaxe son constantes ao longo do noso ciclo vital para adecuarnos a novas situacións ou esixencias, por razóns de superación e crecemento persoal, para o autocoidado da nosa saúde, para o manexo eficiente das nosas finanzas, etc.

Para favorecer a adquisición de novos coñecementos ou de melloralos, dar resposta aos intereses máis variados e á inquietude por relacionarse con outras persoas con intereses afíns propoñemos unha ampla programación formativa en ámbitos relacionados coa arte, idiomas, saúde, educación financeira, historia, entre outros.

A incorporación do exercicio á vida diaria ten efectos beneficiosos e unha repercusión directa na calidade de vida a cualquera idade. Realizalo en grupo suma beneficios á práctica, xa que fomenta a socialización e a cooperación entre as persoas participantes.

Para favorecer a práctica de exercicio, proporcionamos propostas variadas que se adaptan aos obxectivos, estado físico e particularidades de cada persoa participante: Ximnasia, actividades aeróbicas, ioga, pilates, danza, expresión corporal, baile latino, de salón ou obradoiros de prevención de caídas, son algunhas das nosas propostas.

O uso das tecnoloxías da información e a comunicación conéctannos co presente, coa evolución da tecnoloxía, os cambios sociais e as novas tendencias; por iso, son un medio para a participación social.

Para adquirir destrezas prácticas no uso dos teléfonos intelixentes, as tabletas e internet e as súas utilidades para a vida cotiá e aproveitar as oportunidades de relación con outras persoas que nos ofrecen, programamos unha ampla oferta de actividades formativas.

Este ciclo enmárcase dentro do traballo conxunto que desde Afundación e Matía Instituto vimos desenvolvendo desde 2017 para xerar recursos que contribúan ao coñecemento e promoción do benestar emocional das persoas maiores.

Por unha banda, comprende o taller “Coñecendo as miñas emocións”, codeseñado a través dun innovador proceso con persoas maiores socias dos Espazos +60 de Afundación, que ten como fin comprender o proceso emocional e aprender estratexias sobre como xestionar as nosas emocións na vida cotiá. A súa primeira implementación tivo lugar entre os meses de febreiro e maio do ano 2022, en 10 localidades de maneira simultánea.

Doutra banda, inclúe unha versión avanzada do programa, cunha maior dedicación de tempo e profundidade nos contidos, denominado «Afondando nas emocións», testado entre marzo e maio de 2023 nos Espazos +60.

Levar unha vida activa, en xeral, favorece o mantemento das nosas capacidades cognitivas. Estas actividades poderán adestrar a coordinación, memoria, a concentración e control executivo dunha maneira entretida e divertida, a través de xogos e actividades variadas.

Para as persoas que, ademais, queren realizar un traballo específico de prevención, propoñemos actividades para adestrar a coordinación, memoria, a concentración e o control executivo dunha maneira entretida e divertida, a través de xogos  e actividades variadas.

Xa sexa un destino próximo ou unha viaxe a un lugar recóndito, a experiencia de viaxar pode ser unha gran fonte de desfrute. Saír de nosa casa sérvenos para esquecer preocupacións, obrigas e rutinas, abrir a nosa mente, coñecer costumes e culturas e conectar con outras persoas.

En Afundación programamos viaxes pensadas para que as persoas gocen ao máximo, ocupándonos de resolver calquera imprevisto que poida xurdir, xa que, ademais dos guías oficiais, o grupo vai acompañado por persoal de Afundación.

En 2022 programamos as seguientes viaxes:

• A Palma.
• Madeira.
• Rioxa e Álava.
• Austria e o Tirol.
• Provenza e Costa Azul.
• Exipto.
• Camiño de Santiago.

Ademais, segundo a época do ano, cada Espazo +60 de Afundación presenta plans de lecer en grupo para coñecer o patrimonio histórico e natural da nosa terra, visitar museos e acudir a celebracións tradicionais, en ocasións con clases teóricas previas. Esta oferta constitúe un excelente vehículo para favorecer o encontro e as relacións sociais entre persoas de diferentes localidades.

Esta liña de actuación pretende ampliar as oportunidades de participación social das persoas maiores, aproveitando o seu talento e a súa experiencia vital e profesional.

Para iso, en primeiro lugar, desenvolvemos programas interxeracionais destinados a superar a fragmentación por grupos de idade da nosa sociedade a través da interacción entre eles, e poñemos en marcha accións de voluntariado social.