Obradoiros de verán «Capitaneando con intrepidez un mar de pinturas». Santiago de Compostela
Apunta xa a túa rapazada aos nosos obradoiros de verán en Santiago de Compostela. Nenas e neos de 5 a 10 anos poderán participar destes creativos encontros que lles abren as portas a coñecer o universo pictórico de Oswaldo Guayasamín e da exposición «Sonoro empeño» con obras das coleccións de arte ABANCA e Afundación. A semana do 24 ao 28 de xuño van gozar «Capitaneando con intrepidez un mar de pinturas»!
Sede Afundación | Rúa do Vilar, 19
24 de xuño. «Soprade as velas que imos en carabela!»
Coa inspiración do pintor ecuatoriano Oswaldo Guayasamín, converterémonos na tripulación das carabelas de Colón para ir á América do 1492. Fabricaremos o noso propio caderno de bitácora e un catalexo para avistar terra!
25 de xuño. «A unha illa do Caribe…»
Novas paisaxes, novos froitos e novas culturas. Guayasamín levaranos canda el á terra dos incas, un mundo ateigado de cor e fantasía. Crearemos unha máscara con pintura, plumas e pedras preciosas.
26 de xuño. «Yachakay, quechua e outras linguas indíxenas»
Unha busca do tesouro, palabras en idiomas descoñecidos e un obradoiro de manualidades que nos axudará a comprender a riqueza que agochan as linguas indíxenas e as pegadas que deixan na nosa propia lingua. Queres saber como se di o teu nome en quechua?
Centro Obra Social ABANCA | Praza de Cervantes, 19
27 de xuño. «Capitaneando con intrepidez navegamos cara as paisaxes sonoras»
Capitás e capitáns ousados descubrirán novas contornas e explorarán terras pictóricas diferentes para converter unha paisaxe plana nun auténtico pop up.
28 de xuño. «Ondas musicais de babor a estribor»
Moito oído, imos distinguir instrumentos de corda e vento! As audicións musicais inspiraranse nas pezas artísticas da mostra e tamén practicaremos destrezas asociadas á nosa motricidade fina, construíndo un instrumento que recollerá os sons que trae o vento.
Horario: 10.30 a 13.30 h
Prezos: 5 € días soltos | 20 € semana completa
Prazas limitadas!
Inscricións en Ataquilla.com
Máis información en areaeducativacompostela@afundacion.org ou no 981 552 577