Exposición: «MiiC2. Mostra Internacional de Ilustración Contemporánea». Santiago de Compostela

Ampliamos ata o 31 de marzo! Aproxímate á Sede Afundación de Santiago de Compostela á vangarda da ilustración. MiiC, ou Mostra Internacional de Ilustración Contemporánea é unha exposición colectiva que reúne un total de 19 proxectos ilustrados a través dos que compoñer unha fotografía do panorama actual na ilustración a nivel mundial. Con gran presenza de mulleres como a galega LaraLars, ou a andaluza María Hesse, ata artistas de talla internacional como Christoph Niemann.

 

Conéctate á rede Wi-Fi e descarga de balde a aplicación MiiC2 na App Store ou Google Play para gozar de todo o contido adicional das nosas mostras.

 

ACTIVIDADES PARALELAS

OPEN MIIC. 25, 26 e 27 xan. Encontros informais de público e artistas, onde as e os autores explicarán as pezas que expoñen na MiiC2. Estarán: María Hesse, Helena Pérez García, Luisa Rivera, Malota, Bestiola. (Aquí máis información)

FëLiiC. 26 xan. Feira de Edición e Libro Ilustrado (Aquí máis información)

Día da Ilustración. 30 xan. Charla e conversa con Siro López, Anabel Colazo, Andrés Magán, Carlos Arrojo e Bea Lema. (Aquí máis información)

 

As máis de 200 pezas que compoñen a exposición articúlanse arredor de 19 proxectos ilustrados, 16 individuais e 3 colectivos, que poñen o foco nas creacións máis persoais das e dos artistas que se manifestan a través dunha das ramas da comunicación máis libres e creativas. O debuxo e o uso da cor son o fío condutor dunha mostra dedicada a unha xeración dinámica e experimental de artistas, a carón de composicións elaboradas mediante técnicas moi heteroxéneas, desde o collage, videocreacións, cerámicas, instalacións conceptuais, etc.

 

A mostra destaca pola visibilidade do traballo das ilustradoras dentro do campo da creatividade , trece das dezaseis persoas escollidas para expoñer de forma individual son mulleres, o que dá mostra da gran repercusión do seu traballo neste campo. Resalta, ademais, o importante papel da ilustración feita en Galicia, onde contamos cunha magnífica xeración de artistas que marcan tendencia tanto dentro como fóra da nosa comunidade. Lara Lars, Iria do Castelo ou Bea Lema son algunhas das artistas galegas escollidas para esta edición, que, ademais, conta cunha sección dedicada á ilustración en ABANCA, onde sobresae o traballo feito por varios artistas galegos para as campañas de publicidade da entidade.