«O Chef, a receita da felicidade». Ciclo de cine: «Cine para os sentidos» en Santiago
O Chef, a receita da felicidade (Comme un chef) será a película coa que conclúa o ciclo de cine «Cine para os sentidos» o martes 10 de decembro ás 20.00 h no Centro Cultural Fundación Novacaixagalicia de Santiago de Compostela. O gusto, xunto coa ambición e o talento, move a trama d’ O Chef. Jacky Bonnot é un rapaz que soña con triunfar nun gran restaurante, pero vese na obriga de aceptar traballos que non quere como cociñeiro. Un día crúzase con Alexandre Vauclair, un célebre chef que xa non se entende coa súa empresa.
2012. Francia e España. 84 min. Director: Daniel Cohen
«Cine para os sentidos» trátase do novo ciclo de cine gratuíto deseñado pola Fundación Novacaixagalicia. Nesta ocasión os cinco sentidos serán a temática dos cinco filmes que se presentarán: Esencia de muller, O perfume, Copying Beethoven, Entre copas e O chef, a receita da felicidade.
Os cinco sentidos sempre foron representados de xeito maxistral no cinema. Vista, olfacto, ouvido, gusto e tacto adquiren distintas formas de representación na gran pantalla. Desde as súas orixes mudas e ata os nosos días, en que as propias salas contan con distintos efectos reais para ampliaren a nosa experiencia cinematográfica, o cine tivo sempre a grande capacidade de estimular os nosos sentidos unicamente polo poder evocador das súas historias e o poder das súas imaxes. É a maxia da sétima arte.
As proxeccións, en versión orixinal con subtítulos en castelán, terán lugar no centro santiagués todos os martes desde o 12 de novembro ata o 10 de decembro, a excepción do martes 19 que se pasa ao día seguinte, mércores 20. Todas as películas comezarán ás 20.00 horas.
Programación completa do ciclo en Santiago de Compostela
- Martes 12 de novembro: Esencia de muller
- Mércores 20 de novembro: O perfume
- Martes 26 de novembro: Entre copas
- Martes 3 de decembro: Copying Beethoven
- Martes 10 de decembro: O Chef, a receita da felicidade