Mes do Medio Ambiente en Afundación. Xuño 2026
En xuño, celebramos o mes do medio ambiente, pero en Afundación, protexer o contorno natural forma parte da nosa identidade e do noso día a día. O 5 de xuño celebramos o Día Mundial do Medio Ambiente (este ano con Azerbaidján como país anfitrión e os avisos que nos dá o planeta Terra como tema central) e o 8 de xuño o Día Mundial dos Océanos, cuxo lema é «Áreas mariñas protexidas sólidas para o noso planeta azul». Para celebralo, a nosa programación inclúe exposicións, obradoiros, actividades escolares e accións de sensibilización na costa, enmarcadas no noso programa permanente «Educación para a sostibilidade». Protexer o planeta comeza por coñecelo e querelo.
ACTIVIDADES NATURNOVA. Centro Interactivo de Educación Ambiental | VIGO
Coñece curiosidades do universo, o noso planeta e o medio que nos rodea de maneira lúdica, dinámica e participativa.
6 XUÑ 2026 | Xornada de portas abertas | 17.30 a 20.30 h
5 e 12 XUÑ 2026 | Obradoiro de insectos | 17.00 a 18.30 h
23 e 25 XUÑ 2026 | Obradoiro do eclipse
Ademais, durante todo o ano, Naturnova recibe a visita de centros educativos de toda Galicia cun programa de didácticas escolares adaptado a cada etapa, desde Educación Infantil ata Bacharelato. Se queres reservar unha visita co teu centro, podes facelo aquí.
A xornada de portas abertas e os obradoiros de insectos enmárcanse dentro do noso programa solidario Cultura por alimentos, a través do que podes acceder a estas actividades cunha doazón de alimentos non perecedoiros destinados ao banco de alimentos local.
EXPOSICIÓNS
COMEDY WILDLIFE | A Coruña (ata o 12 de setembro)
COMEDY WILDLIFE (exposición de rúa) | Cedeira (ata o 22 de xuño) e Nigrán (ata o 20 de xullo)
MIÑA NAI! Maternidades e crías no mundo animal | Vigo (ata o 20 de xuño)
OS PARQUES NACIONAIS DE ESPAÑA | Valladolid (ata o 7 de xuño)
ACCIÓNS MEDIOAMBIENTAIS PLANCTON. PLAN DE CONSERVACIÓN TERRITORIAL
6 XUÑ 2026 | Recollida de lixo nos meandros do río Sar | Padrón-Dodro
6 XUÑ 2026 | Actividade medioambiental no parque agrario de Fuenlabrada | Madrid
9 XUÑ 2026 | Campaña «O mar comeza aquí» | Sanxenxo
13 XUÑ 2026 | Limpeza de fondos mariños | Bouzas-Vigo
15 XUÑ – 15 SET 2026 | Campaña «Goza da praia sen deixar pegada» | Vilagarcía
20 XUÑ – 15 SET 2026 | Campaña de boas prácticas en mercadiños portuarios | Ribeira
30 XUÑ – 15 SET 2026 | Campaña «Goza da praia sen deixar pegada» | O Grove
A través de PLANCTON, traballamos para protexer o mar e as comunidades que dependen del. «O mar comeza aquí» é unha campaña que busca evitar que as cabichas e outros residuos cheguen ao océano a través dos sumidoiros. Para iso, intervimos artisticamente os sumidoiros das cidades coa técnica do stencil e lembrámosche que todo o que tiramos á rúa pode acabar no mar. «Goza da praia sen deixar pegada» sensibiliza os turistas que visitan as nosas praias no verán sobre a importancia de compatibilizar o gozo dos areais coas actividades socioeconómicas que neles se desenvolven, como o marisqueo a pé. As limpezas de fondos mariños, pola súa banda, son accións de voluntariado directo para retirar residuos do fondo do mar e contribuír á saúde dos nosos ecosistemas costeiros.
O programa «Educación para a sostibilidade», primeiro premio nacional de Medio Ambiente de CECA, está presente en todas as áreas de Afundación. O seu obxectivo é achegar o coñecemento ambiental a estudantes de toda Galicia, e faino a través de accións moi diversas: voluntariado en limpezas de areais e replantación forestal, actividades didácticas vinculadas a exposicións, iniciativas que combinan arte e sostibilidade, e educación ambiental en Naturnova, o único centro deste tipo en Galicia.
Podes visitar a axenda web e descubrir todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte sobre outras actividades escénicas.