Presentación do libro «Xián é terrible». Santiago de Compostela

Xián é terrible é o novo libro de Olaia Sendón Ogando. O libro infantil preséntase na Biblioteca Afundación de Santiago de Compostela o xoves 19 de decembro. Trátase dun álbum gráfico para nenas e nenos.

 

O Xián roe os cables.

Lambe os libros.

Chora e non dorme.

O Xián é terrible.

Pero o Xián ten unha arma infalible que o

protexe de todo mal.

O seu fermoso sorriso desdentado.

 

OLAIA SENDÓN

Ter un fillo cámbiache a vida. Ter dous bebés pequenos de menos de tres, pulverízaa. Sen poder ir rodar, sen poder cumprir as esixentes planificacións propias do cinema, tiven de buscar unha vía de saída, unha creación de guerrilla. Das cinzas do meu traballo anterior naceron estas pequenas historias ilustradas que nun principio non tiñan máis interese ca axudarme no proceso da crianza. Xián naceu para contarlle ao meu fillo maior o que supuña ter un bebé na casa. O que nun principio era pouco máis ca un divertimento acabou converténdose en algo máis. Agora 3 anos despois, a primeira desas historias sae á luz coma unha pequena autoedición de 212 exemplares.

 

SOBRE A EDICIÓN

Xián é terrible ten unha edición limitada de 202 exemplares, a razón deste número pouco convencional é que corresponde coa cantidade de días que tiña o verdadeiro Mouchi cando comecei a escribir este libro. Para darlle unha entidade, cada exemplar está selado e barrado co seu número. As autoedicións son difíciles de encaixar en librerías convencionais que normalmente as relegan ao recuncho máis escondido da tenda. Ao ser esta edición tan pequeniña, podemos permitirnos unha elección máis
coidadosa dos lugares onde se vende. Así que este libro estará só presente nos sitios onde se lle dea o meco acorde co que foi escrito. Independentemente de que sexa unha librería ou calquera outro espazo comercial.