The Rebel (O Rebelde). Ferrol
O 25 de maio a Sede Afundación de Ferrol acolle a proxección e posterior charla-coloquio co produtor e director de The Rebel (O Rebelde), a primeira ópera-rock feita en Galicia, onde se mestura música, teatro, danza e cinema.
The Rebel (O Rebelde) xira en torno á figura de Pàdraig Pearse (interpretado maxistralmente por Fernando Dacosta, nomeado en seis ocasións aos premios de teatro María Casares, acadando tres deles), poeta, mestre, avogado e líder do Alzamento de Pascua en Irlanda. Tras ler a declaración de independencia nas escaleiras da oficina postal de Dublín, Pearse é apresado e condenado nun consello de guerra a pena de morte por fusilamento xunto co seu irmán William (interpretado por Javier Octavio de Toledo), que deixa unha vida de artista en París para loitar a carón do seu irmán, e outros integrantes do movemento. Os dous poemas máis importantes de Pàdraig Pearse foron feitos desde a súa cela a escasas horas do seu fusilamento, un dedicado a súa nai e outro á beleza da vida.
Aínda que naquel momento os irmáns Pearse loitaron por unha causa perdida, plantan a semente para que, anos despois, a súa nai (Mela Casal) consiga, a través das urnas, o recoñecemento polo que os seus dous fillos perderon a vida.
O personaxe de Pàdraig interactúa co público nas pezas teatrais, dirixidas por Elena Seijo (integrante de Sarabela Teatro), e convive tamén no escenario coas bailarinas integrantes do grupo Irish Treble ou co propio cantante Iván Caride. Un espectáculo con historia onde a emotividade e a empatía co protagonista se fan evidentes.
Tanto a música coma o show parte da paixón de Miguel e Iván Caride, que conseguen transportarnos a través das súas composicións a unha época, un lugar e un momento, acompañados por unha banda de músicos excepcionais e grandes profesionais en cada unha das disciplinas. A rodaxe da curtametraxe foi feita integramente en Galicia, concretamente no Mosteiro de Oseira (Ourense), na costa de Loiba (A Coruña) e en Goiáns (Pontevedra), emulando as paisaxes e localizacións orixinais de Irlanda e París a comezos de século.
O espectáculo foi bendito polo propio embaixador de Irlanda en España, Mr. David Cooney, e está incluído no libro conmemorativo do centenario do Alzamento. Incluso Enda Kenny, o primeiro ministro de Irlanda, é coñecedor desta ópera-rock.
Duración da proxección: 72 min.