Ciclo de cinema: Sonoro empeño. Santiago de Compostela
O Centro Obra Social ABANCA de Santiago de Compostela ofrece un suxestivo ciclo de cinema sobre o mundo das artes a partir do 25 de abril e durante todo o mes de maio. Achégate a ver as películas Mr. Turner, Loving Vincent, La Dama de Oro, Big Eyes e El profesor de violín, en versión orixinal con subtítulos en español. As películas escollidas son traballos recoñecidos por crítica e público e con grandes premios internacionais no seu haber, que tratan o tema da arte desde diferentes perspectivas. Esta iniciativa xorde do proxecto cultural Sonoro empeño, que centramos desta volta en Compostela, canda a exposición «Sonoro empeño. A música nas coleccións ABANCA e Afundación» e moitas outras actividades coma concertos, encontros gastronómicos, recitais, obradoiros infantís e máis.
Coñece aquí toda a programación!
Xestiona a túa inscrición aquí
CALENDARIO
25 abril Mr. Turner
8 maio Loving Vincent
16 maio La Dama de Oro
23 maio Big Eyes
28 maio El profesor de violín
20.00 h
Entrada de balde ata encher capacidade. As invitacións deberán recollerse na Sala de Exposicións (Máximo 2 por persoa)
VOSE (Versión Orixinal Subtitulada en Español)
FILMES
Mr. Turner
Mike Leigh, Reino Unido, 2014. 149 min. NRM 12 anos. VOSE
Elenco: Timothy Spall, Dorothy Atkinson, Marion Bailey, Paul Jesson, Martin Savage,Lesley Manville, Ruth Sheen, Roger Ashton-Griffiths
Biografía sobre o pintor británico J.M.W. Turner (1775-1851). Artista recoñecido, ilustre membro da Royal Academy of Arts, vive co seu pai e a súa fiel ama de chaves. É amigo de aristócratas, visita bordeis e viaxa decote en busca de inspiración. A pesar da súa fama, tamén é vítima das burlas do público e do sarcasmo da sociedade. Fondamente afectado pola morte do seu pai, decide illarse. A súa vida muda cando aparece Mrs. Booth, propietaria dunha pensión familiar á beira do mar.
Loving Vincent
Dorota Kobiela e Hugh Welchman, Polonia, 2017. 90 min. NRM 12 anos.
Elenco: Douglas Booth, Helen McCrory, Saoirse Ronan, Aidan Turner, Eleanor Tomlinson, Chris O'Dowd, Jerome Flynn, John Sessions, Holly Earl, Robert Gulaczyk, James Greene, Bill Thomas, Martin Herdman, Josh Burdett, Richard Banks, Shaun Newnham
Un ano despois da morte de Vincent van Gogh, o carteiro Roulin pídelle ao seu fillo Armand que entregue persoalmente a derradeira carta do artista ao seu irmán Theo, logo de que os seus intentos de lla enviar fallasen. A pesar de non o ter apreciado e lembrar o incidente de cando se mutilara a orella e lla dera a unha prostituta, Armand acepta a encomenda… Primeira longametraxe composta por pinturas animadas, en que cada fotograma é un cadro pintado sobre óleo por unha gran listaxe de excelentes artistas, inspirándose no estilo do xenio. Compoñen o filme un total de 56.800 fotogramas.
La Dama de Oro (Woman in Gold)
Simon Curtis, Reino Unido, 2015. 109 min. NRM 7 anos.
Elenco: Helen Mirren, Ryan Reynolds, Daniel Brühl, Tatiana Maslany, Charles Dance, Katie Holmes, Antje Traue, Max Irons, Elizabeth McGovern, Jonathan Pryce, Tom Schilling, Moritz Bleibtreu, Anthony Howell, Allan Corduner, Henry Goodman
Baseada nunha historia real. En 1998 Maria Altmann (Helen Mirren), unha muller xudía que fuxiu de Viena durante a II Guerra Mundial, volve sesenta anos despois para reclamar as propiedades que os nazis confiscaron á súa familia, entre as que se atopa o célebre Retrato de Adele Bloch-Bauer I, de Gustav Klimt. Un avogado mozo (Ryan Reynolds) terá a ben axudala na súa loita co goberno austríaco e coa Corte Suprema dos Estados Unidos. Ao mesmo tempo, Maria deberá enfrontarse ás terribles lembranzas do seu pasado.
Big Eyes
Tim Burton, Estados Unidos, 2014. 106 min. NRM 7 anos.
Elenco: Amy Adams, Christoph Waltz, Danny Huston, Jason Schwartzman, Krysten Ritter, Terence Stamp, Heather Doerksen, Emily Fonda, Jon Polito, Steven Wiig, Emily Bruhn, David Milchard, Elisabetta Fantone, Connie Jo Sechrist, James Saito
Baseada nunha historia real. Margaret Keane comezou a ter un éxito inusitado nos anos 50 e 60 a raíz dos seus cadros, característicos polos grandes ollos dos personaxes que representaba. Eran nenas e nenos que cativaban debido á súa mirada penetrante. Walter Keane, o seu marido, tíñaa convencida de asinar as obras co nome del porque disque era moi hábil para as cousas do marketing... En canto ela comeza a decatarse da manipulación, Walter amosa todas as súas frustracións.
El profesor de violín (Tudo que aprendemos juntos)
Sérgio Machado, O Brasil, 2015. 92 min. NRM 12 anos.
Elenco: Lázaro Ramos, Kaique de Jesus, Elzio Vieira, Sandra Corveloni, Fernanda de Freitas, Hermes Baroli, Criolo, Rappin' Hood, Thogun Teixeira, Graça Andrade
Laertes (Lázaro Ramos), un violinista de gran talento que foi rexeitado na prestixiosa Orquestra Sinfónica do Estado, comeza a dar clases de música a adolescentes dunha escola pública en Heliópole, un barrio dunha zona deprimida de São Paulo. Esta experiencia cambiará a súa vida e a do seu alumnado... Inspirada na verdadeira historia do mestre brasileiro Silvio Bacarelli, que nos anos 90 conseguiu estimular a inclusión social e cultural da mocidade dunha das favelas máis grandes da cidade.
SONORO EMPEÑO
Arte e música danse a man na capital galega, e transforman o Centro Obra Social ABANCA de Santiago de Compostela nun potente, dinámico e sonoro altofalante.
O proxecto cultural SONORO EMPEÑO ofrece un compendio de actividades anovadoras e orixinais, con eixe na mostra homónima que conta con algunhas das obras máis destacadas da Colección de Arte Afundación e ABANCA. Un universo de experiencias orientado a diferentes públicos e deseñado para gozar coa música en moitas das súas variantes, e do diálogo desta con outros conceptos coma a pintura, poesía, escultura, cinema, tecnoloxía, cociña ou ciencia. En conxunto, unha oferta encamiñada a xerar unha experiencia musical, sinestésica e inesquecible. A partir do 25 de marzo.
Coñece aquí toda a programación!