Concerto XOSÉ MIGUÉLEZ & JEAN-MICHEL PILC QUARTET na Coruña
ENTRADAS ESGOTADAS!
Poderiamos definir o Xose Miguélez & Jean-Michel Pilc quartet como unha formación cunha procura insaciable e libre de expresión artística. Esta banda representa a dúas xeracións diferentes, pero cunha mesma maneira de entender a música. Con composicións propias e unha fonda influencia do songbook do jazz americano, pero cunha maneira persoal de interpretalo, respectando a forma mais libertándose do resto dos elementos.
Este concerto enmárcase na iniciativa Cultura por alimentos que Afundación leva a cabo en colaboración con FESBAL e que pretende achegar alimentos de primeira necesidade aos bancos de alimentos locais. Así pois, poderás reservar as túas entradas a través de Ataquilla, e como pago, ao acceder ao concerto, achegar unha doazón de alimentos non perecedoiros. Un xeito de sermos solidarias e solidarios trocando comida por cultura.
Carlos Barretto e Marcos Cavaleiro, dous dos músicos de jazz máis destacados de Portugal, xunto cun dos nomes máis importantes do jazz internacional, o pianista franco-americano Jean-Michel Pilc e o saxofonista galego Xosé Miguélez, fan que composicións saídas de mentes e momentos diferentes, funcionen cunha estética común. Na actualidade atópanse inmersos no proceso de gravación do seu novo traballo discográfico, que será publicado pola discográfica de Seattle Origin Records.
FORMACIÓN
Xosé Miguélez, saxo tenor
Jean-Michel Pilc, piano
Carlos Barretto, contrabaixo
Marcos Cavaleiro, batería.
Xosé Miguélez está considerado como un destacado saxofonista da nova xeración de músicos de jazz da Península Ibérica. O seu máis recente traballo, Ontology, gravado nos Estados Unidos, presentouse na sala Blue room do American Jazz Museum en Kansas City. Este proxecto vén de ser recoñecido co Premio Martín Codax da música galega na categoría de jazz. Na actualidade, traballa no seu segundo álbum que será publicado en marzo de 2022 pola discográfica americana Origin Records.
O pianista e compositor autodidacta Jean-Michel Pilc tocou con numerosos xigantes de jazz como Roy Haynes, Billy Hart, Michael Brecker, Dave Liebman, Jean Toussaint, Daniel Humair e Kenny Garrett, Lenny White, Chris Potter, Mingus Big band, entre outros. Tamén traballou con Harry Belafonte como o seu director musical e pianista, e fixo un dueto coa lendaria cantante de ópera Jessye Norman. Jean-Michel lanzou tres álbums de piano en solitario aclamados pola crítica e un novo álbum en solitario, Parallel, publicado por Challenge Records en xuño de 2018. De 2006 a 2015 foi membro da facultade de NYU Steinhardt. Ensinou para New School en Nova York e desde setembro de 2015 é profesor asociado na Universidade McGill en Montreal.
Cando se trata do jazz en Portugal, o nome do contrabaixista Carlos Barretto (CB) é unha referencia ineludible. Despois de rematar o curso do Conservatorio Nacional de Música de Lisboa, residiu en Viena para especializarse na música clásica, estudando con Ludwig Streischer, un dos grandes mestres do mundo do contrabaixo. Traballou con grandes nomes do jazz, actuando nos festivais máis prestixiosos de Francia, Alemaña, Suíza ou Holanda. Xa en Portugal, gravou 9 CD propios e colaborou en máis de vinte obras de músicos como Bernardo Sassetti, Carlos Martins, Bob Sands ou Mário Delgado. Tocou con Lee Konitz, Steve Grossman, Gary Bartz, entre moitos outros.
Marcos Cavaleiro, batería, é un dos músicos máis demandados da escena do jazz portugués na actualidade. Estudou con Acacio Salero, Alexandre Frazão, Marc Miralta, Michael Lauren e Jeff Williams. Xa tivo a oportunidade de tocar con André Fernandes, André Matos, Afonso Pais, Bernardo Sassetti, Jeff Davis, Juan Moreira, Maria João e Mário Laginha, entre outros moitos. É membro da OJM (Orquestra Jazz de Matosinhos) desde 2007, colaborando con artistas como Carla Bley, Fred Hersch, Jim McNeely, Kurt Rosenwinkel, Lee Konitz, Maria Schneider, Ohad Talmor, Perico Sambeat, Steve Swallow ou Rich Perry.