Proxecto CULTURA POR ALIMENTOS nas sedes Afundación
O proxecto CULTURA POR ALIMENTOS nace por mor da complexa situación económica derivada da crise sanitaria, que está a afectar especialmente a persoas e colectivos que xa se atopaban en situación de vulnerabilidade. Ademais, o incremento do desemprego fixo que multitude de familias que antes da pandemia podían vivir polos seus propios medios, pasen agora a ser parte da bolsa de persoas que necesitan axuda para cubrir necesidades básicas.
O ano 2020 pechouse con case 615 000 fogares galegos con dificultades para chegar a fin de mes, e case 70 000 persoas viven de alimentos doados, xestionados a través de 445 organizacións por toda a comunidade. En España había, a finais de abril deste ano, 1,22 millóns de familias en paro, cifra récord dos últimos tres anos.
A demanda aos bancos de alimentos incrementouse un 50 % durante a pandemia.
Por todo isto, desde Afundación queremos convidar todas as persoas que nos visitan e participan nas nosas actividades ao longo do ano a que colaboren pola causa, doando alimentos para a xente máis vulnerable. Só terán que depositar o ou os alimentos non perecedoiros nas caixas habilitadas á entrada dos nosos edificios en Santiago, A Coruña, Ferrol, Lugo, Ourense, Pontevedra e Vigo como único pago para entrar a calquera dos nosos eventos.
Cultura por alimentos, por tanto, é un programa que promove o troco de produtos e servizos culturais por produtos alimenticios de primeira necesidade.
A campaña funcionará durante o último trimestre de 2021 e todo o ano 2022 con todas as actividades culturais propias que programemos nos centros Afundación, ademais doutras creadas especialmente pola causa, como a dispoñibilidade dun stock de 1000 libros, unha exposición de pop art «Das latas de Andy Warhol ás túas», un ciclo de jazz, teatro infantil, etc.
Os nosos obxectivos coa campaña Cultura por alimentos son apoiar os colectivos máis vulnerables no escenario actual, colaborar e reforzar o labor das ONG, a través da Federación Española de Bancos de Alimentos (FESBAL), reafirmando o papel da cultura como «motor» de cambio social e propiciar a solidariedade.
ENTRA AQUÍ e infórmate de todos os eventos aos que asistir mediante este programa solidario.
