IKFEM Dixital en AfundaciónTV

Chega a oitava edición do Festival de Teclado da Eurocidade Tui – Valença IKFEM, que este ano nos propón unha alternativa online aos seus concertos presenciais para que poidamos gozar da súa música en directo tamén a través das nosas pantallas. IKFEM DIXITAL nace con motivo do COVID para traernos á casa máis opcións en streaming, que a canle AfundaciónTV fornecerá. Aquí tes a programación feita á túa medida do 3 ao 9 de outubro. Vívea!

3 OUTUBRO | PARAÍSO CANTO

Grupo que xorde no 2019, formado por Gabi Reboredo e Martiño Malleiro. Con distintas formacións musicais, a de Martiño máis académica (clásica, jazz), e a de
Gabi máis autodidacta, mais ambas ligadas ás tradicións. Parten do repertorio musical da tradición oral galega, investigan diferentes sons e incorporan tamén música doutras culturas do mundo.

5 OUTUBRO | PABLO LESUIT

Músico multiinstrumentista, cantante e compositor galego que destaca na nova escena da canción iberoamericana polo seu estilo persoal e independente. Nos últimos anos colaborou en gravacións e concertos con artistas coma Jorge Drexler, Eladio y Los Seres Queridos ou Esmeralda Escalante de Aínda Dúo, e participou en grandes festivais de España e Latinoamérica.

6 OUTUBRO | EMILIO VILLALBA & SARA MARINA

Músicos especializados no estudo, recuperación e difusión dos sons e instrumentos históricos, fundamentalmente entre os séculos VIII-XVI. Levan máis de sete anos traballando xuntos nun amplo labor concertista por todo o territorio nacional, Portugal e Francia, con espectáculos de música medieval onde conxugan o teatro, a narrativa e unha gran riqueza tímbrica na interpretación das pezas.

6 OUTUBRO | COLOQUIO CON AINHOA ARTETA [participación interactiva do público inscrito].

7 OUTUBRO | CONCERTO DE AINHOA ARTETA 

É unha das voces imprescindibles do panorama operístico actual, e co recital «Canciones del recuerdo», junto con Javier Carmena ao piano, fará unha viaxe por cancións do recordo con grandes autores do repertorio español como Enrique Granados, Antón García Abril e Ernesto Halffter, e os arxentinos Carlos Guastavino e Ariel Ramírez.

As entradas para a asistencia presencial a este evento no Teatro Municipal de Tui están dispoñibles aquí.

O día previo AfundaciónTV organizará un coloquio con Ainhoa Arteta en que todas as persoas inscritas terán a opción de participar interactivamente a través das plataformas habilitadas para tal fin.

Máis información do concerto aquí.

8 OUTUBRO | VERSOS VERSUS VIRUS

Esta iniciativa xurdiu durante o confinamento da man de Juan José Bustos Pérez, músico multiinstrumentista. A idea abrollou cando encontrou un audio da poeta malagueña Kris León e decidiu musicalizalo e arroupalo con imaxes. A Kris León gustoulle tanto o resultado que Juanjo decidiu estender a proposta. A día de hoxe son máis de corenta poetas quen prestaron a súa voz para este proxecto creativo.

9 OUTUBRO | GALIFUNK BRASS

É un grupo de 10 músicos das aforas de Pontevedra influenciados principalmente polas bandas de música estadounidenses. Buscan rachar coas pautas do clásico e fan as súas propias versións orixinais de temas disco, funky, soul e R&B. O seu repertorio abrangue desde temas propios dos setenta, coma os de Aretha Franklin, ata o máis actual, coma Bruno Mars.

Pódeste facer coas túas entradas da programación presencial do IKFEM en www.ataquilla.com