Exposición THIS IS POP! DAS LATAS DE ANDY WARHOL ÁS TÚAS en Santiago de Compostela

Sesenta e tres producións de vintenove artistas que abordan a arte Pop desde as súas orixes nos anos 50 ata os nosos días. Andy Warhol, Roy Lichtenstein, Robert Rauschenberg, Eduardo Paolozzi, Richard Hamilton, Peter Blake, Yayoi Kusama, Equipo Crónica, Equipo Realidad, Eduardo Arroyo, Rafael Canogar, Damien Hirst, Takashi Murakami, Jeff Koons, Yoshitomo Nara, Julian Opie, Mr., Shepard Fairey (Obey), Kaws, D*Face, Boamistura e Okuda, etc. Queres gozar de todos estes artistas? Visita THIS IS POP! DAS LATAS DE ANDY WARHOL ÁS TÚAS ata o 27 de xaneiro de 2024 na nosa Sede Afundación da Rúa do Vilar. 

comisaria | ANTONELLA MONTINARO

VISITAS GUIADAS para público xeral

14 DEC 2023 | 19.00 h (máx. 25 persoas)

9 XAN 2024 | 19.00 h (máx. 25 persoas)

Asiste de balde a cambio da túa doazón para o banco de alimentos local co programa CULTURA POR ALIMENTOS! Esta iniciativa de Afundación Obra Social ABANCA en colaboración coa Federación Española de Bancos de Alimentos, nace co obxectivo de contribuír, a través de doazóns, a incrementar os recursos dos Bancos de Alimentos de Galicia.

Entra aquí e infórmate polo miúdo sobre o proxecto Cultura por Alimentos.

A arte pop foi un movemento xurdido a finais da década de 1950 en Reino Unido e Estados Unidos como reacción artística ante o expresionismo abstracto e que se caracterizou polo emprego de imaxes e temas tomados da sociedade de consumo e da comunicación de masas aplicados á arte. Utilizaban imaxes coñecidas cun sentido diferente para acadar unha postura crítica da sociedade de consumo. O neo-pop, pola súa parte, é unha corrente artística vivo exemplo da posmodernidade do século XX, onde ironía, repetición, apropiación, deconstrución e distintas linguaxes ou referencias xeran unha arte a veces kitsch e de matices mixtos. Non hai homoxeneidade, igualmente se utilizan como fonte de inspiración as imaxes da cultura popular coma os medios de comunicación de masas. Todos os artistas neo-pop teñen en común o feito de utilizar a iconografía dos cómics, dos debuxos animados, dos anuncios publicitarios ou incluso da obra doutros artistas pop xa consagrados. Igualmente, se algo caracteriza a arte urbana do século XXI arredor do mundo é a súa heteroxeneidade. As intencións dos seus autores son moi diversas e variadas, non todos manexan a linguaxe da subversión e a ironía, non todos tratan de incitar no público reflexións sociais nin políticas, pero si buscan chamar a atención, sorprender ao ocuparen un espazo público non concibido inicialmente para albergar obras deste tipo, ao converteren a rúa nun museo ao aire libre. 

O que une todos estes movementos é un sistema referencial e subxectivo. Trátase duns estilos que regresan á realidade cotiá da vida diaria, unha cultura popular con protagonismo da televisión, as revistas ou os cómics.

Esta exposición inclúe unha selección de artistas que levan traballando a linguaxe pop desde as súas orixes a mediados do século XX ata os nosos días, realizando unha análise comparada das producións artísticas de EEUU, Reino Unido e España. A través dun percorrido multidisciplinar e de carácter divulgativo, o público poderá contemplar desde as serigrafías de Marilyn Monroe elaboradas por Andy Warhol, ata as famosas latas Campbell protagonistas da súa produción, ou a repercusión en España co Equipo Crónica, pasando pola arte pop en Reino Unido e a continuidade no pop urbano.

ESCOLARES

Visita obradoiro STEAM | INFANTIL A 4º PRIMARIA | 2 € escolar
Non STOP para a arte POP. Un divertido xogo de pistas para coñecer e achegármonos á cultura pop, clave e referencia do mundo do cómic, a televisión, o cinema e a música.

Visita obradoiro STEAM | 5º PRIMARIA A 2º ESO | 2 € escolar
Comeríate a versos! Unha viaxe desde os anos 50 do século XX até a actualidade, da man dunha das manifestacións artísticas máis representativas da cultura da posmodernidade.

Visita obradoiro STEAM | 3º ESO, BACHARELATO e C.F. | 2 € escolar
This is pop. Unha viaxe pola arte pop desde as súas orixes á actualidade.

Información e reservas: 981 552 577 | areaeducativacompostela@afundacion.org

Para saber más sobre actividades para escolares entra aquí.