Experiencia de realidade virtual COMPOSTELLA EXPEDITIO: unha viaxe á orixe do Camiño, en Santiago de Compostela

A partir do 20 de xullo, a planta baixa da Sede Afundación Santiago de Compostela acolle «Compostella Expeditio», unha experiencia de realidade virtual de movemento libre desenvolvida por Maxina, froito de catro anos de produción e un ano previo de investigación histórica.

 

Grazas a un dispositivo de realidade virtual, percorrerás fisicamente o espazo e trasladaraste á Compostela medieval: vivirás a translatio do apóstolo, transitarás as rúas do casco histórico, coñecerás a catedral románica e experimentarás de primeira man os momentos fundacionais do Camiño de Santiago. O percorrido conducirate polos episodios chave da tradición: a travesía na barca de pedra, o encontro co reino de Lupa en Iria Flavia, a confrontación coa Coca (o dragón medieval que simboliza os medos do mito) e o instante no que o eremita Paio descobre a tumba do Apóstolo, o que deu comezo a un dos fenómenos culturais e espirituais máis importante de Europa.

 

A experiencia está deseñada para grupos de 2 a 3 persoas, en sesións de 20 minutos. Esta proposta, apta para maiores de 7 anos, está pensada para todos os públicos e especialmente para familias que queiran vivir unha aventura que desafía os límites da realidade.

 

As entradas están dispoñibles en Ataquilla.com e, se queres coñecer o resto da nosa programación cultural, consulta a nosa axenda web.