Exposición COMEDY WILDLIFE, en Vigo
Estreamos exposición en Vigo. Chega «Comedy Wildlife» o 9 de febreiro ao Teatro Afundación de Vigo para amosarnos a cara máis divertida da vida salvaxe. A través das fotografías seleccionadas no recoñecido Premio Comedy Wildlife Photo, dos anos 2015 a 2022, goza dunha magnífica colección na que as diferentes especies animais se conectan co ser humano.
Unha exposición fantástica para visitar en familia, onde moitas das fotos che sacarán un sorriso, e mesmo algunha te fará rir a escachar!
Visítanos na rúa Policarpo Sanz, 13, para coñecela ata o 27 de abril de 2024.
VISITAS GUIADAS para familias
4, 11, 18 ABR | 19.00 h
25 ABR | 17.30 e 19.00 h
Asiste e colabora coa iniciativa solidaria CULTURA POR ALIMENTOS.
Esta mostra enmárcase no programa solidario CULTURA POR ALIMENTOS, en colaboración con FESBAL. Convidámoste a colaborares con alimentos non perecedoiros que podes depositar no acceso ao edificio, e que serán destinados aos bancos de alimentos locais.
Sesenta fotografías son as que compoñen a exposición homónima, «Comedy Wildlife», do certame internacional. As imaxes foron realizadas en distintos recunchos de todos os continentes e todas elas resultaron seleccionadas entre 2015 e 2022 como as mellores instantáneas de animais feitas en clave de diversión e humor no mundo, grazas á colaboración entre Afundación e Terra Espléndida e tras abarrotar en 2023 museos e centros de exposicións dos Países Baixos, Inglaterra, Portugal ou Canadá.
Evitar as mensaxes e as imaxes «deprimentes» é o que busca este certame, e con el a exposición. Isto é o que asegura o cofundador dos premios The Comedy Wildlife, o tamén fotógrafo especializado na natureza Paul Joynson-Hicks, que «as cuestións de conservación e sustentabilidade da vida silvestre están a gañar impulso a nivel mundial, pero as mensaxes e as imaxes tenden a ser negativas, deprimentes e enervantes». E que por iso se animou, xunto aos fotógrafos de natureza Tom Sullam e Michelle Wood, a crear estes galardóns. Desde 2015, premian as imaxes máis divertidas de animais tomadas nun mundo «extraordinariamente belo e interconectado».
«Comedy Wildlife» é unha exposición que cativa toda a familia ao utilizar o humor e a sorpresa como unha forma efectiva de involucrar no encanto do reino animal. As imaxes son extremadamente populares, atraen todas as idades e transcenden todas as culturas e idiomas. Así, as 60 instantáneas seleccionadas que se presentan en Vigo mostran, nas posicións e momentos máis divertidos, a animais como tartarugas, mapaches, osos, pingüíns, etc.
Unha foto divertida de animais é incriblemente eficaz porque non hai barreiras para a comprensión, ou tabús que deben ser negociados. A imaxe aproveita o impulso polo antropomorfismo, que está ben documentado como un dos disparadores máis potentes para a empatía humana. Para entender realmente os animais e as cuestións que lles afectan temos que empatizar con eles como concidadáns do mesmo planeta.
DIDÁCTICA
Para facer máis accesible esta exposición e a súa mensaxe ao colectivo escolar, Afundación deseñou un amplo programa de actividades didácticas e talleres adaptadas ás diferentes idades. Unha proposta que aúna sustentabilidade, diversión e STEAM. Más de 1000 escolares da área metropolitana de Vigo, están apuntados a estes talleres antes da inauguración da mostra para a que se deseñaron tamén visitas familiares e para público xeral, todos os xoves ás 17.30 e 19.00 h.
