Mostra «Fotografía Contemporánea na Colección Telefónica». Santiago de Compostela

Podes gozar desta mostra este outono e ata o mes de xaneiro na Sede Afundación de Santiago de Compostela para afondar no fabuloso universo da fotografía con obras incribles de autores coma Marina Abramovic, Zhang Huan, Helena Almeida ou Cindy Sherman. Cada detalle destas espectaculares imaxes é único, mudando radicalmente o concepto de fotografía. Do 21 de outubro ao 26 de xaneiro, «Fotografía Contemporánea na Colección Telefónica». Estás convidad@. 

Visita guiada inaugural | 21 out. | 18.30 h | CANCELADA

Visita guiada | 24 out. | 18.30 h | GRATUÍTA

Visitas guiadas, previa reserva no 981 552 577.

1 €/ persoa

O fondo de fotografía contemporánea da Colección Telefónica céntrase nun período chave na historia deste medio, o que vai desde finais dos anos setenta a principios do século XXI. Uns anos de profundo cambio na forma de concibir o uso da fotografía no ámbito artístico e que determinou a súa incorporación definitiva aos circuítos da arte.

Algúns museos americanos empezaron a coleccionar fotografía a comezos dos anos trinta do século XX, e tampouco faltaron críticos e historiadores da arte que prestasen atención ao fotográfico antes dos setenta, mais tanto a práctica da fotografía artística coma a súa difusión eran limitadas fronte ao seu uso dominante, relacionado coa imprenta e os medios de comunicación. Xornais, revistas ilustradas e libros eran o soporte tradicional en que as fotografías chegaban ao gran público. Todo iso comezou a cambiar co uso do soporte fotográfico por parte dalgúns artistas pop, coma o propio Andy Warhol, ou os conceptuais, como Ed Ruscha. O salto deuse coa aparición dunha nova xeración de artistas que utilizaban para as súas creacións o soporte fotográfico e que concibían a súa presentación non como páxinas impresas dun libro ou revista, senón como ampliacións, enmarcadas, que reclamaban a mesma forma de contemplación ca un cadro.

A exposición ilustra na segunda planta este momento de transición e ten precisamente como punto de partida os traballos apropiacionistas dos americanos Richard Prince, John Baldessari ou Sherrie Levine, seguidos a continuación doutros artistas que a través das súas fotografías reflexionan sobre a construción da imaxe, o corpo, a identidade de xénero, ou un novo modo de facer documentalismo. Fronte a esta liña de traballo, no andar tres, sitúase como eixo fundamental a fotografía da Escola de Düsseldorf, con Bernd e Hilla Becher á cabeza e os diferentes camiños percorridos por algúns dos nomes máis importantes da fotografía contemporánea actual.