Mostra «A Arte no Cómic». Vigo
O proxecto expositivo de Fundación Telefónica, «A Arte no Cómic», chega a Vigo. Do 26 de abril ao 30 de xuño podes coñecer o traballo de máis de 70 ilustradores de prestixio que reinterpretan algunhas das obras máis emblemáticas da historia da arte. Visítaa na Sede Afundación de Vigo.
Co gallo da mostra preparamos un completo programa de ACTIVIDADES PARALELAS coma un ciclo de cinema ou interesantes coloquios con xente destacada do mundo da ilustración. Aquí tes o próximo:
«O museo e o cómic». Con Fabrice Douar 7 XUÑO // 19.00 h
O director de publicacións do Museo do Louvre visitaranos para abordar a súa visión sobre a frutífera e recente relación entre o cómic e o mundo dos museos.
«A Arte no Cómic» estrutúrase en tres grandes ámbitos: o primeiro deles recolle a relación entre os grandes centros de arte e o cómic a través de obras da colección do Louvre ou do Museo de Orsay xunto á editorial Futuropolis, mostrando o traballo de autores tan recoñecidos como Catherine Meurisse, Manuele Fior, Enki Bilal ou David Prudhomme, así como a obra de Edmond Baudoin sobre Dalí, editada polo Centro Nacional de Arte e Cultura Georges Pompidou. Tamén se inclúen iniciativas dos centros de arte españois, coma os cómics de Miguel Ángel Martin, Álvaro Ortiz, David Sánchez e Santiago García, editados polo Museo Thyssen-Bornemisza e a editorial Astiberri. Fundación Telefónica tamén se sumou a esta iniciativa encargando versións libres dalgunhas das mellores pezas do seu patrimonio artístico a diferentes ilustradores, que ofrecen a súa visión de obras de Picasso, Tàpies ou René Magritte.
O segundo ámbito está centrado no cómic desenvolto por autores galegos como Brais Rodríguez e Miguelanxo Prado, ao que se engaden con motivo da mostra en Vigo dous novos autores, Begoña García-Alén e Andrés Magán. Ademais, Jacobo Fernández Serrano preparou para este proxecto, por encarga de Afundación, unha historieta baseada nalgunhas das obras e autores máis sobresaíntes da Colección de Arte Afundación, Pikiblinder: Leiro, Maruja Mallo, Castelao, Laxeiro, Lugrís ou Minguillón, entre outros.
Por último, a exposición recolle como as grandes obras da pintura aparecen no cómic, facendo especial fincapé na actual corrente museográfica que avoga por un achegamento á novena arte como unha disciplina que ineludiblemente ha de estar presente na programación dos museos e grandes centros. Trátase dunha nova visión do mundo da pintura, unha mirada persoal e unha homenaxe dos autores de bandas deseñadas que, conscientes da capacidade narrativa desta, utilizan os seus recursos para nos mostrar o mundo da pintura dun modo distinto ao que habitualmente ofrecen críticos e teóricos da arte.
VISITAS GUIADAS para grupos
Todos os xoves 19.00 h GRATIS
Ou luns a venres en horario a convir, previa cita no 986 129 032 ou por correo-e a areaeducativavigo@gmail.com. 1 € / asistente
ACTIVIDADES ESCOLARES
DO LENZO AO CÓMIC. Infantil a 3º de primaria
BOCADILLOS DE CÓMIC E HISTORIA. 4º de primaria a 2º de ESO
A ARTE NO CÓMIC. 3º e 4º de ESO, bacharelato e CF
Prezo: 1 € / participante
ACTIVIDADES PARALELAS
Ao longo dos próximos meses tes na nosa Sede Afundación de Vigo varios eventos interesantes con relación á mostra «A Arte no Cómic»: un CICLO DE CINEMA coas películas de animación máis galardoadas, COLOQUIOS con ilustradores de primeiro nivel e a exhibición dun CÓMIC XIGANTE deseñado expresamente para a sala de exposicións por dous artistas de Vigo e Pontevedra, Andrés Magán e Begoña García-Alén. Infórmate polo miúdo aquí!