Exposición 5 MURAIS. Aproximación á narrativa gráfica dentro da aula. Pedro Cifuentes, en Vigo

Ata o 30 de abril podes visitar a exposición educativa "5 MURAIS. Aproximación á narrativa  gráfica dentro da aula" firmada por Pedro Cifuentes na Biblioteca do Teatro Afundación de Vigo onde se atopa a Comicteca. Trátase dun conxunto de cinco paneis con láminas debuxadas polo ilustrador e docente nas que se tratan, de maneira didáctica, temas coma o cambio climático, os obxectivos de desenvolvemento sostible, o Día das Letras Galegas e mesmo, a Colección de Arte Afundación. Ademais, todo aquel que formalice o seu carné de socio ou socia da Biblioteca será obsequiado, ata fin de existencias, cunha lámina de Batman ou dalgún dos seus viláns, cortesía de ECC, colaborador deste novo espazo.

 
Cun fondo articulado por 1500 volumes, doados por Asier Mensuro, impulsor da iniciativa, e Octavio Beares, a Comicteca dinamiza novas linguaxes e disciplinas artísticas.

 
Os 1500 exemplares que integran a Comicteca, a primeira das súas características en Galicia e que conta cun fondo vivo que se irá incrementando a cada paso coa colaboración de distintas editoriais e particulares, datan desde os comezos da ilustración gráfica ata a máis recente actualidade. Poden consultarse tanto en sala coma en préstamo a domicilio, unha vez se formalice o carné de socia ou socio da Biblioteca Afundación Vigo.