Exposición SACRIFICIO E ASCENSIÓN. Quince anos de cómics de DAVID RUBÍN. A Coruña
SACRIFICIO E ASCENSIÓN. 15 ANOS DE CÓMICS DE DAVID RUBÍN, unha mostra que percorre con espírito antolóxico as diferentes etapas, influencias e series desta gran figura da ilustración, partindo dos seus primeiros traballos en Galicia para acabar cos últimos no esixente mercado americano. David Rubín (Ourense, 1977) é un dos historietistas españois máis recoñecidos nos últimos anos. É cofundador do colectivo Polaqia, formado por historietistas de Galicia e recoñecido con varias candidaturas aos pretixiosos premios Eisner. Desde uns duros comezos en que o cómic era unha paixón, máis ca un traballo, ata o momento actual, en que deviu nun dos historietistas máis solicitados do panorama internacional, esta é a exposición máis extensa, completa e ambiciosa das realizadas sobre este autor, con máis de 230 obras, en que se reflicten todos os seus fitos creativos.
3 NOV | VISITA GUIADA INAUGURAL | 19.00 a 20.00 h
A cargo do artista David Rubín e do curador da mostra Asier Mensuro.
3 NOV | INTERVENCIÓN MURAL | 11.30 a 12.30 h
O propio David Rubín rematará un mural da súa autoría na sala de exposicións. Ademais, mediante un audiovisual proxectado en sala, poderemos seguir todo o proceso de creación do mural, vendo como emerxe o debuxo desde as primeiras liñas do lapis.
COMISARIO | Asier Mensuro
Na súa primeira etapa como profesional destacan títulos como La tetería del oso malayo ou Cuaderno de tormentas; mais non é ata El Héroe, cando consegue o éxito nacional e internacional, xa que se publica no estranxeiro, abríndolle a porta a outros mercados. Ségueo Beowulf, outra obra sobresaínte que o confirma coma un dos autores fundamentais do panorama actual. Comeza así a traballar para o mercado americano en series coma Aurora West, La Ficción, Ether ou Sherlock- Frankenstein, combinando os devaditos traballos con outros realizados directamente para o mercado español, como Gran Hotel Abismo ou Fuego, o seu último proxecto aínda en desenvolvemento, que verá a luz en 2021 da man da editorial Astiberri.
Da man desta exposición, Afundación converteuse en pioneira na aplicación de tecnoloxía de Realidade Aumentada tanto na propia sala de exposicións coma na visita virtual albergada aquí. Esta tecnoloxía permite que, quen visita a sala en presencial ou en virtual, acceda a contidos extras a través do seu dispositivo móbil: descrición de personaxes, proceso creativo, bosquexos, e moitas máis sorpresas que chegan ao visitante a través da AR (Augmented Reality) deseñada para varias obras da exposición. Con esta aplicación, Afundación promove que as visitas ás salas de exposicións sexan unha experiencia con que descubrir moito máis do que parece exposto e que esta información sexa ademais accesible desde calquera lugar do mundo con conexión a Internet.
* Esta mostra enmárcase na iniciativa Cultura por alimentos que levamos a cabo en colaboración con FESBAL e que pretende achegar alimentos de primeira necesidade aos bancos de alimentos locais. Colabora coa túa achega cando nos visites!
