Exposición CORNAMUSAS PRIMITIVAS E ICONOGRAFÍA DA GAITA, en Lugo
A Sede Afundación Lugo acolle na súa sala de exposicións CORNAMUSAS PRIMITIVAS E ICONOGRAFÍA DA GAITA.
Historia da civilización, unha mostra onde coñecer a historia e variantes do instrumento galego máis icónico, que tamén forma parte de diferentes culturas e pobos ao longo e ancho do mundo. Europa, Asia ou África amosan variantes morfolóxicas e tímbricas do instrumento ao pescudar na súa iconografía, desde a mostra escultórica sobre rocha en Taq-i-Bostan (Kermanshah, s. VI d.C.) en Persia (actual Irán), ata a xirolarrua (País Vasco), tomada das portadas das catedrais peninsulares (s. XIII). Visítaa ata o 24 de maio de 2025.
Ruth Foxo e Xosé Lois Foxo | COMISARIADO
VISITA GUIADA INAUGURAL
Con Xosé Lois Foxo e Ruth Foxo
xoves 27 FEB | 19.00 h
Actividade libre e gratuíta.
Esta exposición forma parte do noso programa solidario CULTURA POR ALIMENTOS, unha iniciativa coa que te convidamos a colaborares doando produtos non perecedoiros para os bancos de alimentos locais, en colaboración con FESBAL, Federación Española de Bancos de Alimentos. Grazas!
Hai máis de 2.600 anos, na antiga Persia, na actual zona de Irán, as cornamusas xa eran obxecto de representación artística. Durante séculos, o ser humano expandiunas polo planeta e foi dándolle diferentes formas e nomes. Sobre a viaxe do instrumento musical polo tempo e o espazo, e sobre como foi representada co devalar dos séculos, trata esta exposición.
A historiadora e música Ruth Foxo, e o musicólogo e director da Real Banda de Gaitas da Deputación de Ourense, Xosé Lois Foxo, comisarían a mostra, que tamén aproxima o público ao valioso documento que conforman as diferentes denominacións da gaita en cada rexión cultural. A gaita chega aos tempos actuais dende a máis remota antigüidade. Cada pobo e cada cultura déronlle a súa pegada morfolóxica e tímbrica. A viaxe que presenta a exposición «Cornamusas primitivas e iconografía da gaita» é tamén un percorrido, a partir da gaita, por terras coma as actuais Suecia, Xeorxia, Romanía, Croacia, Tunisia, Irán, Turquía, Malta, Ucraína ou España.
Ruth Foxo explica que a cornamusa nace coma un mero desenvolvemento da frauta de cana simple para chegar desde culturas como a exipcia e a persa ata outras como a grecolatina, estendéndose por Europa, África e Asia. As persoas que visiten a mostra poden coñecer tamén como foi variando, na xeografía e no tempo, a maneira de representar o instrumento.
DIDÁCTICA
- INFANTIL a 4º PRIMARIA | Visita-conto con obradoiro | «A arte de converter o aire en música»
- 5º PRIMARIA a 2º ESO | Visita con obradoiro | «Fun polo aire e vin polo vento»
- 3º ESO, BACHARELATO e CF | Visita comentada con obradoiro opcional | «Cornamusas primitivas, historia da civilización»
2 €/estudante
Máis información e reservas en areaeducativalugo@afundacion.org ou no 982 289 096
