Concerto: Maria do Ceo. A Coruña
Desde aquelas Cartas de Amor (1997), o seu primeiro disco, escritas vocalmente coa tinta indeleble da emoción, bambeándose entre a nostalxia, a melancolía, a dozura, a paixón e a tenrura, até hoxe, pasaron os anos e con eles este «ceo» de artista, cunha entrañable humildade e o don da súa voz. Centenares de concertos e catorce discos que deixaron unha fonda pegada, marcan un itinerario emocional con múltiples recoñecementos desde as dúas beiras do Miño.
O novo disco volve unir fado e música galega nun espazo emocional en que as texturas sonoras expresan sentimentos compartidos pola melancolía e no que a «saudade» e a «morriña» emerxen na súa voz e se amosan en contextos claros e recoñecibles, cunha tensión de afectividade musical que atrae de inmediato.
En Maria do Ceo. A fadista mantense fiel o estilo sobrio e elegante dos seus directos, en compañía de Alex Salgado (Guitarra Portuguesa) e José Salgado (Guitarra española), que adornan e dan colorido instrumental a un concerto «auténtico», tanto vocal como musicalmente, que remove «fluídos» emocionais e deixan que a vida siga abrollando.
Nonito Pereira