Axenda

Nova conferencia do Ciclo EDUCACIÓN S. XXI con ANA CABANA, en Lugo - Afundación

Nova conferencia do Ciclo EDUCACIÓN S. XXI con ANA CABANA, en Lugo - Afundación
O xoves 14 de marzo, a prestixiosa historiadora e investigadora sobre perspectiva de xénero Ana Cabana ofrece dous encontros con motivo do ciclo EDUCACIÓN S. XXI. O primeiro deles, dirixido a escolares, será ás 11.00 h, e o segundo pase para público xeral, pola tarde, ás 19.00 h. 
 
ESCOLARES | 11.00 h | "A conto de que unha historia das mulleres?" | INSCRICIÓN
PÚBLICO XERAL | 19.00 h | "Historia das Mulleres: miserias, logros e retos dunha maneira de facer historia" | INSCRICIÓN
 

Esta conferencia tratará de botar luz sobre o pasado da metade da poboación, o gran obxectivo co que xorde nos anos setenta do século XX a historia das mulleres, unha área de coñecemento cada vez con máis presenza dentro da historia e en constante relación con outras disciplinas das Ciencias Sociais e das Humanidades, tamén interesadas no estudo das mulleres, das feminidades e do movemento feminista. Trátase dunha forma de facer historia, unha maneira de pensar, ler e escribir sobre o pasado que descobre o rol das mulleres en sociedades pretéritas, a súa relación con outras mulleres e cos homes, ademais de atender á evolución no tempo da construción cultural que é o xénero (feminidades e masculinidades). A conferencia achegará unha síntese sobre a evolución dunha disciplina pouco aberta a incluír o condicionante de xénero nas súas pesquisas.

 

Prestixiosa historiadora e investigadora, Ana Cabana ten a forza e a enerxía abondas coma para, a través dos seus estudos, pór a ollada na historia e as historias condenadas ao esquecemento. Ana Cabana ten a difícil tarefa de emendar os erros do pasado e mostrarlle a escolares e familias que, os libros de historia esqueceron as mulleres e, sen elas, a metade da poboación carece de referentes. Non é casual que as nenas e adolescentes decidan evitar carreiras científicas ou técnicas, ou que sintan unha importante presión social en moitos aspectos da súa vida. Se non reconciliamos a nosa historia, se non coñecemos de onde procedemos, dificilmente poderemos acadar unha saúde mental colectiva. 
Ana Cabana foi premiada pola súa introdución á perspectiva de xénero. 
 

Esta conferencia enmárcase dentro do programa CULTURA POR ALIMENTOS impulsado por Afundación, a Obra Social ABANCA, en colaboración coa Federación Española de Bancos de Alimentos para incrementar os recursos do banco de alimentos local. Convidamos todas as persoas que asistan a este evento a colaborar con esta campaña solidaria coa doazón de produtos non perecedoiros, que poderán depositar á entrada do recinto.

 

CICLO EDUCACIÓN S. XXI

Un programa de conferencias para dar a coñecer as últimas tendencias, estudos e teorías sobre Educación a toda a comunidade escolar, desde as familias ao propio estudantado e, por suposto, ao equipo docente. Grandes especialistas xa pasaron polos nosos edificios nas distintas cidades galegas, ofrecendo o seu enfoque profesional para apoiar a educación desde a casa e desde a escola. 

 

MÁIS INFO AQUÍ.