Exposición 40 ANOS DE AUTONOMÍA DE GALICIA NAS CARICATURAS DE SIRO, en Lugo

Despois de estar na Coruña e Ferrol, a última exposición do Parlamento de Galicia, "40 anos de Autonomía de Galicia nas caricaturas de Siro", protagonizada polas viñetas políticas do talentoso Siro, chega agora á nosa Sede Afundación Lugo. Nela poderás ver a historia gráfica da Autonomía Galega a mans do artista ferrolán, referente do noso humor gráfico, cunha selección das súas mellores ilustracións en La Voz de Galicia, desde 1981 ata 2006. Agora estará na cidade das murallas, desde o 4 de setembro e ata o 11 de outubro de 2025. 

 

Colabora co noso proxecto solidario CULTURA POR ALIMENTOS, traendo unha doazón de produtos non perecedoiros para axudar os bancos de alimentos locais. Infórmate!

 

Desde as dependencias do Parlamento de Galicia, a mostra chega directamente ás nosas salas, exhibindo as viñetas políticas elaboradas por Siro para La Voz de Galicia entre os anos 1985 e o 2006, canda outras pezas da primeira lexislatura autonómica (1981-1985), e unha ducia máis de debuxos inéditos feitos para plasmar a etapa política liderada por Alberto Núñez Feijoo. Aos debuxos de Siro acompañaranos algunhas portadas de La Voz de Galicia que dan testemuña dos asuntos abordados polo artista nas súas viñetas.

 

Coordinación | ASER ÁLVAREZ 

 

«En 1985, Santiago Rey Fernández-Latorre propúxome trocar a Oficina Técnica de Bazán pola redacción da La Voz de Galicia para dedicarme só ao xornalismo, e aceptei. Foi un acerto. Juan Ramón Díaz, o director, tivo outro cando me dixo: “Vas facer cada día unha viñeta sobre o feito político máis importante na comunidade”. O éxito foi extraordinario. Ver en caricatura e en situacións cómicas aos protagonistas da política galega era tan novidoso, que divertía por igual a lectores e protagonistas das viñetas. Por iso, en 1986, celebrouse nos baixos de San Caetano unha exposición con cen orixinais e á inauguración asistiron líderes de todos os partidos. Fun consciente de que na Voz estabamos a facer a historia gráfica da Autonomía galega e, para que nada quedase por analizar, botei a vista atrás e ilustrei os feitos máis relevantes desde o comezo da primeira lexislatura, en Nadal de 1981. Parte desa historia quedou recollida nos álbums Cofrades do Cristo da Autonomía (1988), 16 anos de Parlamento Galego (1998) e A Autonomía Galega nas caricaturas de Siro (2009).

Recentemente, doei ao Parlamento de Galicia case 1600 orixinais e hoxe presentamos esta mostra cunha escolma de 230, feita, naturalmente, cun criterio de calidade dos debuxos; pero na que tamén recordamos os momentos da maior transcendencia e a políticos con gran protagonismo, que xa non están con nós.

Poderiamos facer outras, con 230 orixinais diferentes e serían igualmente representativas, pero esta é a que prefiro para poñer punto e final a unha vida de caricaturista político que comecei hai cincuenta anos».

 

Mostra organizada polo Parlamento de Galicia, coa colaboración de La Voz de Galicia e Afundación, Obra Social ABANCA.