Zenet presenta en directo no Teatro Afundación o seu novo disco, Las manos y la voz, este sábado

«Levo o público de paseo, da man, e espero que o pasen ben». Así se refería o cantante Zenet (Málaga, 1967) nunha entrevista hai algúns días aos concertos da súa xira Las manos y la voz. Zenet chega coa xira ao Teatro Afundación este sábado, día 7 –20:30 horas–. Las manos y la voz é tamén o nome do máis recente traballo do artista malagueño. Viu a luz nas últimas semanas do pasado ano. «É un disco íntimo, artesanal e moi persoal», aseguraba Zenet nas súas redes sociais. O álbum retoma sonoridades do bolero, jazz, fado… Os seus temas, e as cancións máis coñecidas de Zenet, tomarán o teatro da Obra Social de ABANCA en Vigo o sábado. Aínda quedan entradas en Ataquilla.com.

O do Teatro Afundación é o terceiro dos concertos da nova xira de Zenet. Chega de Madrid, onde a semana pasada se presentou no Teatro Circo Price. Estará acompañado por 8 músicos sobre o escenario nun concerto centrado, como o álbum que presenta, na esencia da canción e nos xéneros que marcaron a vida do cantante.

Emocións

Con máis de 15 anos de traxectoria, a de Zenet é unha das voces máis icónicas do jazz e do folclore en español. O seu estilo ecléctico e versátil converteuno nun referente, combinando xéneros como bolero, jazz, bossa nova, swing ou blues, sempre cunha interpretación única e sedutora.

Na nova xira do cantante, como no disco que presenta, estará moi presente a figura de José Taboada, compañeiro musical de Zenet recentemente falecido.

Aseguran dende a contorna de Zenet que o do próximo sábado no Teatro Afundación non será só un concerto, senón un percorrido sonoro cun Zenet como protagonista, que se abre en canal e chega ao escenario na súa máxima expresión.

Hai imaxes dalgúns dos espectáculos nesta ligazón.