Xornalistas de 8 países xa enviaron os seus artigos para o Premio Internacional Afundación de Periodismo Julio Camba
O próximo 10 de setembro termina o prazo para a presentación de candidaturas ao Premio Internacional Afundación de Xornalismo Julio Camba. O galardón, que alcanza a súa cuadraxésimo sexta edición premiando artigos xornalísticos de opinión ou de carácter literario, continúa avanzando na súa internacionalización: a falta dun mes para que finalice o prazo de admisión de candidaturas para a presente edición, xornalistas de 8 países enviaron os seus traballos para participar.
O Premio Internacional Afundación de Xornalismo Julio Camba está dotado cun total de 14.000 €. A autora ou autor do texto gañador recibirá 10.000 €; ademais, haberá dous segundos premios de 2.000 € para as dúas persoas que resulten finalistas. Os textos participantes deben ser publicados entre o 1 de setembro de 2024 e o 31 de agosto de 2025.
O formulario en liña para a presentación de artigos está no sitio web da Obra Social de ABANCA, onde ademais poden consultarse as bases da convocatoria.
Xurado e gala de entrega
O Premio Internacional Afundación de Xornalismo Julio Camba volverá ter un xurado integrado por voces de prestixio dos medios e das letras. Antes de que acabe 2025, o xurado fará unha primeira selección para designar 3 artigos como finalistas. O mesmo día no que se celebra a gala de entrega do premio, que terá lugar en Madrid a comezos de 2026, o xurado volverá a deliberar para decidir cal dos tres artigos resulta gañador. Inmediatamente despois procederase ao acto de entrega.
O galardón recoñece a excelencia de artigos de opinión e de contido literario, alcanza este ano a súa cuadraxésimo sexta edición. Na anterior, na que a participación medrou un 80%, competiron 241 artigos literarios. O texto «Madrid se viene abajo: vivir en el cuarto de las fregonas», publicado por Alberto Olmos en El Confidencial, foi o gañador. Resultaron finalistas senllos artigos das xornalistas Eileen Truax (México) e Natalia Junquera (España).
Un premio cunha gran historia
O Premio Internacional Afundación de Xornalismo Julio Camba é, pola súa traxectoria e dotación, un dos máis importantes do ámbito do xornalismo en español.
Desde que o xornalista Gonzalo Fernández da Amora gañou a súa primeira edición, en 1980 e cun xurado entón presidido polo escritor Gonzalo Torrente Ballester, mereceron o galardón artigos de xornalistas como Luciano del Río Besada, Carlos García Bayón, Alfredo Conde, Bernardo Víctor Carande, Antonio Odriozola, Raimundo García Fernández, Adolfo Prego, José Montero Alonso, Rafael Landín Carrasco, Julio Sierra, Xesús Ferro Ruibal, Arturo Lezcano Fernández, Santiago Castelo, Torcuato Luca de Tena, Carlos Casares, Miguel Ángel Cuadrado, Juan Manuel de Prada Blanco, Diego Bernal López, Alfonso Eire López, César Casal González, Miguel Suárez Abel, Manuel Rivas Barros, Manuel Jabois, Marino Gómez Santos, Eugenio Fuente, Fernando Savater, Felipe Benítez Reyes, Andrés Trapiello, Pedro Ugarte Tamayo, Ángela Vallvey Arévalo, Ramón Pernas López, José Manuel Otero Lastres, Ángeles Caso, Luis Ventoso, Ignacio Camacho, Ramón Loureiro Calvo, Miguel Anxo Murado, Ricardo Fernández Colmenero, Cristina Sánchez Andrade, Luis Pousa, Bibiana Candia, Manuel de Lorenzo Paradela, María Sánchez e Alberto Olmos.