Unboxing Alice, teatro participativo en inglés, na programación de teatro para escolares de Afundación en Lugo

Afundación, a Obra Social de ABANCA, presenta o mércores 21 de xaneiro, ás 10.00 e ás 12.00 h, no Auditorio Municipal Gustavo Freire de Lugo, unha nova proposta escénica dentro da súa programación de actividades para escolares: Unboxing Alice, de On Stage Company, dirixida a público desde 5º e 6º de primaria. Asistirán preto de 1080 estudantes procedentes de 18 centros educativos de Lugo e localidades derredor.  

O teatro participativo será a ferramenta máis útil, práctica e divertida para aprender inglés. Pasou moito tempo desde que Alicia visitou Wonderland por última vez. Tweedle Dee e Tweedle Doo, vendo como o seu esplendor se vai apagando, deciden renovarse, adaptarse aos tempos e transformarse en youtubers! Conseguirán os xemelgos deixar atrás o seu pasado e conquistar as redes? Serán quen de escapar da longa sombra de Alicia? Descúbreo nesta divertida viaxe polo universo de Lewis Carroll cun final made in Nintendo!

As artes escénicas teñen unha especial relevancia dentro da programación para escolares que deseña cada curso o equipo da área educativa de Afundación co obxectivo de reforzar a formación que os estudantes reciben nas aulas. A programación está deseñada para promover unha educación en valores e competencias transversais potenciando o talento, a autonomía, a solidariedade, a creatividade, a autoestima ou o traballo en equipo. Neste sentido, as artes escénicas están consideradas como unha das ferramentas educativas máis útiles para estimular a capacidade de observación dos estudantes, posibilitar o diálogo e a reflexión, e desenvolver habilidades sociais.