Amigos da Ópera achega o xénero a máis de mil estudantes de primaria da Coruña en Afundación

Co obxectivo de romper os estereotipos e de mostrar a ópera como unha proposta moito máis próxima do que en moitas ocasións está na mente do público, especialmente a idades temperás, nace o programa «Ópera para nenos». Máis de 1000 escolares de terceiro e cuarto de primaria de distintos centros da Coruña e comarca poderán gozar desta proposta, que se enmarca na programación didáctica de Amigos da Ópera da Coruña desde unha perspectiva de achegarse á lírica como «unha arte por descubrir e á cultura en xeral como un medio para viaxar a través do tempo e o espazo».

O auditorio da Sede Afundación da Coruña acollerá este martes e mércores, con dúas funcións ás 10 e ás 11.30 h,  unha proposta na que os estudantes se achegarán á ópera a través de fragmentos de Carmen e L’elixir d’amore, interpretadas polo equipo de Ópera Kids. Durante unha hora, os participantes farán un percorrido a través da música por China, Francia, Italia e España, nunha actividade na que poderán participar sumando as súas voces.  Trátase dunha masterclass que, como destacan desde Amigos da ópera, «dá unha oportunidade de aproximarse a este xénero desde idades temperás, dunha forma directa, próxima e adaptada a diferentes idades, situando a ópera nun plano máis próximo a todos eles».

Coas entradas xa esgotadas, «Ópera para nenos» celebra a súa cuarta tempada a través da colaboración de Amigos de la Ópera, a Deputación da Coruña, INAEM, a Fundación Emalcsa, Xunta de Galicia e Afundación.

As funcións enmárcanse ademais no programa solidario «Cultura por alimentos», mediante o cal Afundación, en colaboración coa Federación Española de Bancos de alimentos (FESBAL), anima á doazón de produtos non perecedoiros a modo de entrada solidaria, que se poderán depositar nos contedores habilitados para o efecto nos espazos de Afundación, para a súa posterior doazón ao banco de alimentos local.