A UIE nomeará profesora honoris causa a Kerry Kennedy, presidenta da Fundación Robert F. Kennedy Human Rights
Kerry Kennedy, presidenta da Fundación Robert F. Kennedy Human Rights, visitará Galicia os próximos 3 e 4 de novembro no marco da colaboración subscrita entre a fundación que custodia o legado do seu pai, o senador estadounidense Robert F. Kennedy, a Universidad Intercontinental de la Empresa e Afundación.
O luns 3 de novembro, a UIE nomeará a Kerry Kennedy profesora honoris causa da Facultade de Administración de Empresas e Dereito nunha cerimonia solemne que terá lugar ás 18.00 h en Santiago de Compostela. A presidenta da Fundación Robert F. Kennedy Human Rights pronunciará unha conferencia maxistral e recibirá o diploma e a medalla académica da UIE. O reitor Miguel Ángel Escotet fará a laudatio: «Kerry Kennedy: A forza da palabra, a compaixón e a lei». Previamente, manterá un coloquio cos estudantes da UIE na súa sede en Santiago.
A visita institucional de Kerry Kennedy forma parte do protocolo de colaboración asinado pola súa fundación en España, a UIE e Afundación para establecer un marco de traballo conxunto que permita impulsar programas que contribúan a difundir a necesidade de concienciar sobre os dereitos humanos, a tolerancia e os valores democráticos en nenos e novos. O programa continuará ao día seguinte, martes 4 de novembro, no IES Rosalía de Castro, onde manterá un encontro ás 11.00 h con estudantes e profesores como parte da programación deseñada polas tres entidades.
Fundación Robert F. Kennedy Human Rights
A Robert F. Kennedy Human Rights Foundation, con sede en Washington D.C. e con presenza en 60 países, foi creada en 1968 por amigos e familiares do senador estadounidense Robert F. Kennedy, asasinado ese ano, para promover o seu legado moral. Entre as súas iniciativas destaca a concesión do Premio de Dereitos Humanos con ese nome desde 1984 ao obxecto de distinguir a persoas de todo o mundo que fixesen unha contribución significativa aos dereitos humanos nos seus respectivos países.
En 2019 Kerry Kennedy, filla de Robert F. Kennedy, fundou a súa división española, RFK Human Rights Spain, con sede en Madrid, que se centra en preservar os seus valores: a defensa dos dereitos humanos, a xustiza social e o poder da acción individual. Así, a fundación promove a paz, o respecto, a educación en valores e o desenvolvemento do talento en nenos e adolescentes, fomentando a cohesión social e a diversidade.
Kerry Kennedy, ten un doutoramento na prestixiosa Facultade de Dereito de Boston College e varios doutoramentos honoris causa e premios internacionais en Estados Unidos, América Latina e outros países dos cinco continentes. Entre as súas publicacións destacan Dicir a verdade ao poder, Robert F. Kennedy: Ondas de esperanza e Citizenship Education and the Modern State.
Imaxes da firma do protocolo de colaboración entre UIE, Afundación e RFK Human Rights Spain e de Kerry Kennedy con seu pai AQUÍ