A RFG estrea o 7 de novembro na Sede de Afundación a obra breve Cometa, da compositora Núria Giménez-Comas
O Auditorio da Sede de Afundación en Pontevedra acollerá o 7 de novembro a estrea dunha das 16 cometas encargadas pola Real Filharmonía de Galicia (RFG) a outros tantos compositores e compositoras para conmemorar o seu trixésimo aniversario, que se cumpre en 2026. Son, as cometas conmemorativas da RFG, breves obras sinfónicas, de ata 5 minutos de duración. Oito delas están asinadas por autoras e autores de Galicia; as outras 8 compuxéronas profesionais do resto de España. O concerto, no que a formación musical compostelá estará dirixida pola alemá Ruth Reinhardt, comeza coa estrea da Cometa da compositora catalá Núria Giménez-Comas e dá paso logo a creacións de Hubert Parry, Detlev Glanert, e Johannes Brahms. Os membros da Sociedad Filarmónica de Pontevedra, que colabora na organización da sesión musical, poderán recoller as súas entradas os días 5 e 6 de novembro na sede da organización ou, o mesmo día 7, no Auditorio de Afundación. Tamén hai entradas á disposición do público xeral en Ataquilla.com.
As 16 cometas encargadas pola Real Filharmonía de Galicia sumaranse durante os concertos da tempada 2025-2026 ás grandes obras do repertorio sinfónico da orquestra. Explican, dende a RFG, que queren establecer así «un diálogo entre o pasado, o presente e o futuro da música. Imaxinamos estas obras como raios de luz, reflexións sonoras que, xuntas, construirán un mosaico diverso e vibrante da música contemporánea».
De Giménez-Comas a Rainhardt
A autora da obra sinfónica que será estreada en Pontevedra, Núria Giménez-Comas (Girona, 1980) é unha das compositoras catalás con maior proxección e actividade internacional. Moi interesada na música mixta, a súa obra foi interpretada por recoñecidos ensembles e orquestras en todo o mundo. Colabora habitualmente con orquestras de prestixio e recoñecidos directores e directoras. Fixo obras por encarga para entidades coma o parisiense Ircam-Centre Pompidou ou o Gran Teatre del Liceu de Barcelona.
A súa Cometa estrearase baixo a dirección da alemá Ruth Reinhardt. Actualmente directora musical da Filharmónica de Rhode Island (EE.UU), Reinhardt (1988) formouse no seu país natal e nos Estados Unidos, onde desenvolve unha parte importante da súa carreira. Está especialmente centrada en composicións creadas desde Europa, con énfase significativa en compositoras da segunda metade do século XX e principios do século XXI. Dirixe e dirixiu importantes orquestras de Europa e os Estados Unidos.
Repertorio
A Cometa de Núria Giménez-Comas será a primeira composición que se escoite no concerto do 7 de novembro no Auditorio da Sede da Obra Social de ABANCA. Despois, a RFG interpretará a Elexía para Brahms en La menor de Hubert Parry (Inglaterra, 1848).
Séguea a obra de Idyllium, de Detlev Glanert (Alemaña, 1960), que tamén homenaxea a Johannes Brahms. «Por iso só podía ser Brahms», explican dende a RFG, «quen puxese o broche final ao programa coa Serenata núm. 2, dedicada á que foi a súa musa, Clara Schumann».
«Cultura por alimentos»
O concerto da RFG no Auditorio da Sede de Afundación forma parte do programa «Cultura por alimentos», que a Obra Social de ABANCA leva a cabo en colaboración coa Federación Española de Bancos de Alimentos (FESBAL). As persoas asistentes poderán entregar alimentos non perecedoiros no acceso á sede de Afundación en Pontevedra para a súa distribución entre persoas e familias en risco de exclusión.
Hai imaxes de Ruth Reinhardt e da RFG nesta ligazón