A ciencia e os mitos sobre as eclipses explicados pola astrofísica Eva Villaver na Sede Afundación A Coruña
«Eclipses: maxia, medo… e ciencia» é o título da conferencia que a doutora en Astrofísica e subdirectora do Instituto de Astrofísica de Canarias, Eva Villaver, impartirá o próximo 11 de agosto ao 19.00 h na Sede Afundación A Coruña e cuxas entradas están xa dispoñibles en Ataquilla.com.
A actividade, aberta a toda a cidadanía e con entrada gratuíta previa reserva, ofrecerá un percorrido pola historia cultural e científica dun dos fenómenos naturais máis espectaculares do ceo. A través dunha linguaxe próxima e accesible, Villaver mostrará como as eclipses pasaron de ser interpretados como sinais sobrenaturais a converterse nunha ferramenta fundamental para comprender o funcionamento do universo.
Durante a conferencia, os asistentes descubrirán como estes eventos axudaron aos científicos para estudar a atmosfera terrestre, coñecer mellor a dinámica do sistema solar e mesmo comprobar algunhas das teorías máis importantes da física moderna. A charla está dirixida a todos os públicos, sen necesidade de coñecementos previos, e busca espertar a curiosidade e a fascinación pola astronomía entre persoas de todas as idades.
«Queremos invitar a cidadanía a realizar unha viaxe polo pasado, o presente e o futuro das eclipses na Terra», sinalan desde a organización, que destaca o carácter divulgativo e participativo da actividade.
Unha investigadora de referencia internacional
Eva Villaver é profesora de investigación e subdirectora do Instituto de Astrofísica de Canarias (IAC). Doutora pola Universidade de La Laguna, desenvolveu unha salientable carreira científica en institucións de referencia internacional como a NASA, a Axencia Espacial Europea (ESA), a Universidade Autónoma de Madrid e o Centro de Astrobioloxía.
Ademais, dirixiu a Oficina de Espazo e Sociedade da Axencia Espacial Española e actualmente forma parte do Space Science Advisory Committee (SSAC) da ESA. Recoñecida polas súas investigacións sobre a evolución dos sistemas planetarios e as ananas brancas, participou no descubrimento de decenas de exoplanetas e é autora de centenares de publicacións científicas.
Comprometida coa divulgación científica, é autora do libro Las mil caras de la Luna, colaboradora habitual de medios de comunicación e recibiu recoñecementos como o Premio da Sociedade Xeográfica Española (2023) e o Premio de Divulgación da Carreira da Muller (2024).
Unha actividade aberta á cidadanía dentro do congreso «Invisibles26»
A conferencia forma parte das actividades abertas ao público organizadas co gallo de «Invisibles26», un congreso internacional que reunirá na Coruña, na Sede de Afundación, do 10 ao 14 de agosto, algúns dos principais especialistas mundiais en física de partículas, cosmoloxía e astrofísica.
O encontro, integrado no proxecto europeo ASYMMETRY e financiado polo programa Horizonte Europa da Unión Europea, abordará algúns dos maiores enigmas da ciencia actual, como os neutrinos, a materia escura e os sectores ocultos. Entre os participantes figuran investigadores de referencia internacional, incluído o Premio Nobel de Física 2015, Takaaki Kajita.
A conferencia de Eva Villaver constitúe a principal actividade de divulgación aberta á cidadanía dentro deste encontro científico internacional.