Afundación, ABANCA e o Concello de Tui inauguran «Destino. Unha peregrinación de Manuel Valcárcel»
O Concello de Tui, ABANCA e Afundación, a Obra Social de ABANCA, inauguraron hoxe a mostra fotográfica «Destino. Unha peregrinación de Manuel Valcárcel». O acto de apertura, que tivo lugar esta mañá na Sala de Exposicións Municipal do Edifico Francisco Sánchez, contou coa asistencia do alcalde do Concello de Tui, Enrique Cabaleiro; o coordinador institucional de ABANCA en Pontevedra, José Luis Romero; a directora da oficina de ABANCA en Tui, Belén Gayo; e a coordinadora adxunta da Área de Cultura de Afundación, Paloma Vela.
A mostra poderase visitar ata o vindeiro 8 de novembro, de luns a venres en horario de 9.00 a 14.00 h e de 15.30 a 20.30 h, e os sábados, de 9.00 a 13.00 h.
A EXPOSICIÓN «DESTINO. UNHA PEREGRINACIÓN DE MANUEL VALCÁRCEL»
Nesta terra de emigrantes e peregrinos sabemos mellor ca ninguén da importancia vital da viaxe, un percorrido físico que implica, en paralelo, unha reflexión interior sobre os nosos valores, a nosa identidade e as nosas necesidades. Nas catro peregrinacións do fotógrafo galego Manuel Valcárcel fálasenos de familia, de emigración, de envellecemento, de sostibilidade e de fogar, grandes temas da humanidade que teñen a súa correspondencia no labor social de Afundación, a Obra Social de ABANCA, e que nesta exposición afloran a través da viaxe interior e física de Valcárcel e das súas potentes imaxes cargadas de emoción, vida e cor.
«Destino» amosa catro peregrinacións en catro países de catro continentes ―O Tíbet, Senegal, México e Galicia―, alicerzándose na fotografía documental como ferramenta narrativa e contando distintas historias unidas por un mesmo sino. Concíbese esta expedición como unha viaxe en espiral de seres humanos unidos e guiados polo destino, na busca de respostas a preguntas universais que nos atinxen a todas as persoas do mundo.
Á súa vez, a mostra realiza a súa particular viaxe polas diferentes localidades de Galicia nas que se mostra dentro do programa «Corrente cultural», que permite a Afundación programar actividades culturais, grazas á colaboración cos concellos e con ABANCA.