O Teatro Afundación inaugura a segunda parte da súa Tempada de Abonos o xoves con Ana Torrent
Ana Torrent, Gabino Diego ou Lola Herrera forman parte da relación de intérpretes que se subirán ao escenario do Teatro Afundación entre os meses de outubro e decembro para protagonizar os espectáculos programados na Tempada de Abonos de teatro da Obra Social de ABANCA. Torrent será a encargada de darlle vida a un personaxe de referencia no teatro occidental do século pasado: Petra von Kant, unha deseñadora de modas que tras deixar ao seu esposo se namora doutra muller. A obra As amargas bágoas de Petra von Kant poderá verse o vindeiro xoves, 2 de outubro (20:30 horas). As escasas entradas aínda dispoñibles están a ser distribuídas a través de Ataquilla.com.
A montaxe, que inaugura a segunda metade da Tempada de abonos de teatro en Vigo neste 2025, volve sobre o texto homónimo co que o escritor e cineasta Rainer Wener Fassbinder sorprendeu a crítica e público en 1971. A proposta, que rompendo tabús e convencionalismos conectou moi rapidamente coas xeracións máis novas e coa crítica nunha época de efervescencia política e cultural, tivo tanto éxito que tan só un ano despois o propio Fassbinder a levou ao cinema.
Teatro para a reflexión
Polo libreto de As amargas bágoas de Petra von Kant desfilan temas e invitacións á reflexión sobre cuestións como o poder nas relacións de parella, ou o emprego do diñeiro ou o sexo como ferramentas de poder.
A historia que conta o espectáculo comeza cando, pouco despois de separarse, Petra von Kant coñece a Karin, unha moza oportunista de orixes humildes da que namora perdidamente. Mesmo lle promete convertela nunha modelo internacional. A relación entre ambas as mulleres resultará tormentosa.
A obra, dirixida por Rakel Camacho e cuxo elenco completan Aura Garrido, Julia Monxe, María Luisa San José e Maribel Vitar, ten unha duración estimada de 85 minutos e é a oitava das programadas polo Teatro Afundación dentro da súa Tempada de Abonos neste 2025.
Tempada de Abonos
Coa Tempada de Abonos, a Obra Social de ABANCA programa cada ano algúns dos mellores espectáculos teatrais do momento en España. As persoas interesadas nas obras poden retirar abonos para asistiren a todas as producións a prezo reducido ou comprar entradas de forma individual para cada espectáculo.
No primeiro semestre deste ano, e dentro do programa a Tempada de Abonos do Teatro Afundación, o público puido gozar da calidade actoral de intérpretes como María Adánez, María Galiana e José Sancristán ou de grupos como Els Joglars.
«Cultura por alimentos»
Moitos dos eventos que se programan no Teatro Afundación forman parte do programa solidario «Cultura por alimentos», desenvolto pola Obra Social de ABANCA en colaboración coa Federación Española de Bancos de Alimentos (FESBAL). As persoas que asisten aos espectáculos poden colaborar depositando alimentos non perecedoiros nos contedores dispostos para tal fin. As doazóns serán distribuídas por FESBAL entre familias en risco de exclusión de Pontevedra e a súa área de influencia.
Hai imaxes do espectáculo nesta ligazón