O programa de Afundación «Coñecendo as emocións» chega a Madrid en colaboración con tres entidades
. Hoxe en día numerosos estudos destacan a relación entre as habilidades asociadas á intelixencia emocional e a obtención de resultados positivos como o benestar subxectivo, a calidade de vida ou a satisfacción vital. Dito doutro xeito, dedicar tempo a reflexionar e aprender sobre a conciencia, a comprensión, a expresión e a regulación emocional pode favorecer un maior equilibrio interno, unha mellor adaptación e unha vida máis plena en calquera etapa. Estas habilidades e competencias emocionais adquiren un papel fundamental no proceso de envellecemento no que os desafíos físicos, emocionais e sociais adoitan intensificarse, por exemplo, coa aparición de enfermidades, a perda de seres queridos ou os cambios de contorna. Así o corrobora o programa «Coñecendo as emocións» desenvolto por Afundación e Matia Instituto.
Nesta nova edición 2025-2026, a quinta, o programa chega por primeira vez a Madrid en colaboración coa residencia San Camilo, a Fundación SUMMA Humanitate e Cruz Vermella. Representantes destas tres entidades subscribiron un convenio para o desenvolvemento nos seus centros. Na firma estiveron David de Miguel, director de Intervención Social e Emprego de Cruz Vermella da Comunidade de Madrid; María Eugenia Auado Lora, directora da Fundación Summa Humanitate; José Manuel Martínez Galán, xerente do centro San Camilo; Sabela Couceiro, coordinadora da área de Maiores de Afundación e Armando Fandos, responsable da área de Entidades non Lucrativas e Impacto de ABANCA.
Nesta edición fóra de Galicia participan 35 persoas: 9 usuarias do Centro de día Reina Sofía de Cruz Vermella, 12 sacerdotes diocesanos xubilados residentes nunha casa sacerdotal xestionada pola fundación Summa Humanitate e 12 persoas adultas maiores residentes e usuarias do Centro de día e a residencia San Camilo.
As persoas participantes, con moi diversos perfís, comparten como xeración unha barreira cultural que limitou a súa expresión emocional. Para elas e eles, o programa facilitou un espazo seguro para identificar, nomear e xestionar os seus sentimentos, promovendo un cambio profundo no seu benestar persoal e relacional. Nesta apreciación inciden tamén as persoas facilitadoras, quen destaca, como no caso de María Eugenia Augado, directora da Fundación Summa Humanitate, que «compartir o que sentimos é liberador, conéctanos mellor co mundo e cos demais, só é necesario que se propicie un clima de confianza e de escoita xenuína». Nesta liña, un dos participantes desta entidade manifesta «Isto deberiámolo facer todos, é moi importante, quítache moitos “sufrimentos morais”».
Unha visión que comparten tamén desde a Residencia San Camilo, cuxo facilitador, Pablo Posse subliña que «a resposta dos residentes e usuarios do centro de día foi moi satisfactoria. Ao longo das sesións, exploraron as emocións, aprenderon a recoñecelas e relacionarse con elas de forma positiva, o que nos animou a implementalo en próximas edicións»
Imaxes da sinatura AQUÍ
COÑECENDO AS EMOCIÓNS CHEGA A ENTORNOS DE ATENCIÓN E COIDADOS
«Coñecendo as emocións» foi co-deseñado con persoas maiores, testeado, validado e implementado en catro edicións sucesivas. Tras a exitosa experiencia con persoas socias dos 11 espazos +60 Afundación, o programa estendeuse desde 2024 a 47 centros de distintas entidades que traballan tamén no ámbito das persoas maiores en localidades das catro provincias e que agora chega a Madrid. O obxectivo é compartir aprendizaxes e xerar unha rede de entidades sociais do ámbito do envellecemento activo e saudable con interese en traballar a mellora do benestar emocional a medida que envellecemos. Sumando os participantes desta nova edición 2025-2026, a quinta, chegará a máis de 1000 persoas de distintas localidades galegas, tanto rurais como urbanas, e a Madrid.
Nesta edición, como continuidade do traballo de cocreación levado a cabo polo equipo de Afundación con profesionais de 6 entidades en 2024, impártese unha versión do programa que se adaptou ás necesidades e capacidades cognitivas de participantes de centros de día e residencias e persoas usuarias de asociacións que traballan contornas vinculadas ás enfermidades mentais. A transcendencia desta adaptación consiste en levar a formación en competencias emocionais a contornas asistenciais e de coidados con materiais especificamente adaptados.
Os resultados obtidos ata o de agora evidencian que o programa permitiu a mellora do benestar e a adquisición de competencias emocionais das persoas participantes, segundo a investigación realizada por Afundación e Matia Instituto, entidade de referencia en España na materia e con máis de 20 anos de traxectoria. Os resultados, validados ao longo de 5 edicións, mostran que 9 de cada 10 persoas obtiveron beneficios nalgunha dimensión, mellorando a súa conciencia emocional, a súa comprensión das emocións, a súa regulación ou o seu nivel de benestar. Ademais disto, os participantes relatan que melloraron nas súas relacións con eles mesmos e cos demais, grazas á adquisición e desenvolvemento de habilidades e competencias como a escoita activa, a comunicación asertiva ou aprender a poñer límites. Tamén se observa un resultado significativo na saúde percibida, de maneira que as persoas valoran mellor o seu estado de saúde ao finalizar o programa de forma consistente ao longo das edicións do programa.