O xurado do Premio de Xornalismo Francisco Fernández del Riego terá que elixir entre 43 artigos
A participación no Premio de Xornalismo Francisco Fernández del Riego medrou máis dun 80 % na actual edición. Un total de 43 artigos compiten polo o galardón. Tres dos textos serán declarados finalistas polo xurado neste verán. Xa no último trimestre do ano, o órgano decisorio volverá reunirse no día da entrega do premio para decidir cal dos artigos resulta gañador. A súa autora ou autor recibirá 10.000 €. Haberá 2000 para cada un dos artigos finalistas.
O galardón acada este ano a súa vixésimo terceira edición. Dende 2004, o Premio de Xornalismo Francisco Fernández del Riego distingue os mellores artigos de opinión ou de carácter literario publicados en galego. Nas tres edicións máis recentes, gañárono Rexina Vega (2025), Diego Ameixeiras (2024) e Mar Mato (2023).
Na actual edición, presentáronse artigos publicados na totalidade dos principais medios de comunicación escritos de Galicia. Un total de 25 textos están asinados por homes, e os 18 restantes foron escritos por mulleres.
Francisco Fernández del Riego
O premio rende tributo a Francisco Fernández del Riego (1913 – 2010). Ensaísta, narrador, editor e xornalista, pertenceu á promoción de intelectuais que xurdiron ao abeiro do Grupo Nós e do Seminario de Estudos Galegos. Comprometido cos procesos de modernización e reconstrución da identidade cultural e política de Galicia, Fernández del Riego foi membro do Partido Galeguista, animador dos programas en lingua galega na BBC, co-fundador da Editorial Galaxia e codirector da revista Grial. Colaborou en moi diversas publicacións periódicas, dentro e fóra de Galicia, e ata finais de 2009 foi director da Biblioteca da Fundación Penzol. Doou a súa obra e o seu patrimonio intelectual á cidade de Vigo, onde residiu desde o ano 1940.
Edicións anteriores
Entre as persoas que gañaron as edicións anteriores do premio tamén están Fina Casalderrey, Carlos G. Reigosa, Rosa Aneiros, Manuel Rivas, Manuel Bragado, Luís Pousa, Ramón Loureiro, Tamara Montero, Miguel Anxo Murado, Inma López Silva, Cristina Pato, Míriam Ferradáns e Francisco Castro. Os artigos premiados ata o ano 2024 foron escolmados nun libro pola Obra Social de ABANCA. O volume pode ser descargado sen custe, e en formato PDF, na web de Afundación.
Hai imaxes da entrega da anterior edición do premio nesta ligazón