O Grupo de Teatro do Espazo +60 Afundación presenta Lágrimas de sangre na Coruña

O Grupo de Teatro do Espazo +60 A Coruña de Afundación, a Obra Social de ABANCA, presenta mañá xoves, 16 de abril, a obra Lágrimas de sangre, un espectáculo idea do seu director, Víctor Díaz Barús, tamén responsable da selección musical, sobre as últimas horas na vida de Federico García Lorca. Con guión de Lola González, socia do Espazo +60 Afundación A Coruña, e a partir de poemas de Federico García Lorca, este espectáculo, que combina emoción, poesía e compromiso social, é gratuíto, previa doazón de alimentos non perecedoiros, que se destinarán á campaña solidaria «Cultura por alimentos», en colaboración coa Federación Española de Bancos de Alimentos.

Ambientada en agosto de 1936, a peza sitúa ao espectador na Colonia, unha leira convertida en prisión improvisada durante os primeiros días da Guerra Civil Española. Nese espazo de espera, incerteza e silencio, Lorca revive fragmentos da súa vida, as súas inquietudes, as súas paixóns e a súa obra, nun diálogo constante entre o pasado luminoso e o presente tráxico.

O espectáculo entrelaza poemas do propio Lorca con textos e diálogos escritos por Lola González Macarro, creando unha dramaturxia que transita entre o real e o evocador. A selección musical de Víctor Díaz Barús acompaña e amplifica a carga emocional da escena, achegando unha dimensión sensorial que envolve ao espectador.

A través desta proposta de 90 minutos de duración aproximada, o público penétrase na mente e o corazón do poeta nas súas últimas horas, explorando non só o seu legado artístico, senón tamén a súa humanidade, os seus medos e o seu inquebrantable amor pola vida e a creación. A obra convértese así nun acto de memoria, unha homenaxe á cultura e unha reflexión sobre a violencia, a liberdade e a transcendencia da arte.

Esta proposta enmárcase no ámbito da promoción do voluntariado e o compromiso social e cultural de Afundación.

O Grupo de Teatro do Espazo +60

O Grupo de Teatro do Espazo +60 de Afundación foi fundado na Coruña no ano 1984 polo profesor e director Víctor Díaz Barús. Debutan ese mesmo ano con motivo do 25 aniversario da inauguración do Espazo +60 Afundación da Coruña coa obra Casamento á forza de Molière. 

A partir do ano 1992 alcanza unha gran notoriedade nos circuítos de teatro afeccionado, con numerosas saídas e recoñecementos tanto no ámbito galego como estatal. Mesmo algún dos seus integrantes participa en series de televisión como Mareas vivas, Libro de familia ou Serramoura, en películas como O lapis do carpinteiro e en diferentes anuncios.