O espectáculo SuperArte chega por primeira vez a Galicia coa Fundación SIFU e Afundación

O Teatro Afundación de Vigo acollerá por primeira vez en Galicia o próximo 3 de decembro SuperArte, considerado o espectáculo inclusivo máis importante de Europa. O evento, promovido pola Fundación SIFU coa colaboración de Afundación, ten como obxectivo visibilizar o talento artístico de persoas con discapacidade e demostrar que a arte pode ser un motor de cambio social e unha ferramenta para a transformación e a integración. As entradas están dispoñibles desde hoxe en Ataquilla.com.

Este é un dos proxectos que forman parte do programa SuperArte da Fundación SIFU, que ten como obxectivo orientar, formar, acompañar e mellorar a empregabilidade de calquera persoa con discapacidade que teña unha inquietude artística. «Construímos itinerarios individuais adaptados ás necesidades concretas de cada persoa para impulsar a súa carreira formativa e profesional no mundo das artes escénicas», subliñou hoxe na presentación Guillermo Gutiérrez, director de desenvolvemento da Fundación SIFU. Gutiérrez remarcou así mesmo que «é imprescindible o tecido asociativo e relacional que xeramos en cada zona onde impacta o proxecto, xa que sen o talento local non podemos construír un proxecto sostible e de longo percorrido».

Con esa mesma visión, Afundación impulsa este evento «coa firme vontade de visibilizar o potencial das artes como instrumento de cohesión social e desenvolvemento das persoas con diferentes condicións», subliña a coordinadora de Cultura da entidade, Marité Cores, quen sinalou que «na Obra Social de ABANCA hai unha liña de actuación estable neste ámbito, ao contar con programas protagonizados e impartidos por persoas con discapacidade que atoparon na música, a danza e outras disciplinas artísticas unha saída para canalizar a súa vocación e os seus coñecementos. Estas iniciativas contribúen, ademais, a normalizar a discapacidade e a reducir a brecha que existe na sociedade». Así mesmo remarcou que o espectáculo SuperArte será unha magnífica oportunidade para coñecer os avances tecnolóxicos que contribúen a romper barreiras e animou a que as empresas sigan apostando por este tipo de desenvolvementos».

Pola súa banda, Cristina Lago, directora da Fundación Igualarte, fundación que actuará no espectáculo cunha produción propia de danza creada especialmente para o evento, destacou que «cada vez máis a profesionalización das persoas con discapacidade é unha realidade e unha aposta segura. O que temos que facer é cambiar a mirada da sociedade». Unha visión que comparten Alfonso Franco, de Galicia Fiddle, que participa tamén co proxecto aloxando no seu campus San Simon Fiddle a artistas vinculados a SuperArte, quen incidiu en que «as persoas con discapacidade son parte como artistas da tradición cultural en todo o mundo, e é algo que non debemos esquecer»; e o músico e compositor Anxo Pintos, que tamén colaborará no evento cunha peza  «que compuxemos cuxo papel é conseguir que, dalgún xeito, todas as persoas que participan teñan un rol protagónico. É importante garantir o acceso universal á música a toda a cidadanía e promover unha mirada heteroxénea a través da diversidade».

Arte sen barreiras

SuperArte é un encontro onde a cultura convértese en altofalante da diversidade e a emoción é tan protagonista como os propios artistas. A través de producións propias é unha plataforma que visibiliza as capacidades de intérpretes que demostran que o talento non ten límites.

A produción conta, ademais, con instrumentos tecnolóxicos que fan accesible a música, como o Eyeharp, un software que permite interpretar música coa mirada a persoas con mobilidade reducida, ou o travel sax, unha adaptación do saxo tradicional, máis pequeno e lixeiro, pensado para persoas con capacidade pulmonar reducida ou algún tipo de discapacidade física.

Nesta nova edición, SuperArte contará con oito actuacións de música e danza protagonizadas por artistas con diversas discapacidades que atoparon na arte un medio para superar barreiras e expresar a súa creatividade e o seu talento. Joel Bueno, artista con parálise cerebral, tocará un piano de cola grazas a un brazo robótico desenvolvido pola empresa ABB en colaboración con Erni. Ismael Rosario, artista e creador de música a través de Eyeharp, mostrará como esta tecnoloxía permite a persoas con discapacidade tocar música a través da mirada.

No evento participarán tamén Aarón Moratón, violinista; Adrián Esparza, artista multifacético e cunha carreira musical que abarca desde o canto, o rap, ata a produción musical e a docencia; Jaín Codina, bailarín de danza urbana e Nieves López, cantante de rap e produtora, quen presentará a súa nova composición Como a curo.

Ademais, a habitual orquestra inclusiva do espectáculo contará coa colaboración de 23 músicos do Conservatorio Superior de Música de Vigo e da Fundación Igualarte, que se unirán aos protagonistas para crear unha experiencia artística aínda máis enriquecedora. Finalmente membros da Orquestra SondeSeu e músicos da ETRAT interpretarán a composición Medley Muñeiras, con arranxos de Anxo Pintos e Oriol Saña, director artístico da produción.

Un espectáculo único en Europa

SuperArte é o maior evento inclusivo e artístico de Europa, coa celebración de máis de 20 representacións nos mellores escenarios de España, o máis recente o Teatro Real no mes de setembro, que reuniron a máis 20.000 espectadores e máis de 100 artistas con e sen discapacidade.

A iniciativa forma parte do programa SuperArte da Fundación SIFU, que promove a formación e a carreira profesional de artistas con discapacidades a través das Bolsas SuperArte. Estas bolsas aseguran unha educación de calidade para aqueles artistas que contan cun talento innato, permitíndolles desenvolver plenamente o seu potencial e dedicarse profesionalmente á súa disciplina.

A Fundación SIFU é unha entidade sen ánimo de lucro que, desde o seu nacemento en 2006, ten como obxectivo desenvolver actividades para a integración sociolaboral de persoas con discapacidade, así como de calquera outro colectivo en risco de exclusión social.

O seu compromiso é transmitir e concienciar á poboación sobre a diversidade que existe na sociedade e a importancia de apostar pola integración e a inclusión das persoas con discapacidade, compromisos que comparte con Afundación e que se materializan nesta colaboración conxunta para a realización desta gala inclusiva.