O Espazo +60 Afundación de Vigo expón as obras realizadas polos participantes nos obradoiros de debuxo e pintura

Os participantes nos obradoiros de debuxo e pintura que se imparten no Espazo +60 de Vigo de Afundación, a Obra Social de ABANCA, dirixidos pola profesora Paz Parrado, amosarán as obras resultantes do traballo realizado durante todo o curso nunha exposición que se inaugurará mañá, xoves 16 de xullo, ás 12.00 h, na Sala de Exposicións II da Sede Afundación de Vigo. Poderase visitar ata o vindeiro 24 de xullo en horario de 10.30 a 14.00 h.

Cada obra que conforma a mostra amosa o esforzo dos alumnos e alumnas por dominar conceptos como a luz e a sombra, as gamas, as transparencias ou as texturas. Ao mesmo tempo, atopamos retratos, paisaxes e mariñas que buscan lograr unha estética acorde cos estilos que agradan aos seus autores.