O Espazo +60 Afundación de Ferrol entrega a recadación da súa tenda solidaria á Cociña Económica
Persoas voluntarias do Espazo +60 de Afundación en Ferrol entregaron esta mañá un cheque solidario á Cociña Económica desta localidade coa recadación obtida na súa tenda solidaria. O total ascende a 2800 euros, obtidos grazas á venda de produtos de artesanía realizados por socias voluntarias do Espazo+60 que participan durante todo o ano no Taller Solidario. No acto de entrega estiveron a coordinadora do Espazo +60 Afundación de Ferrol, Mercedes Garnelo; o tesoureiro da Cociña Económica de Ferrol, Julián López; e as socias voluntarias participantes.
A iniciativa xurdiu no ano 2005 no obradoiro de manualidades do centro, cando a profesora que dirixía a actividade trasladou que no Sanatorio da Fundación Fontilles de Alacante escaseaban vendas para os seus pacientes con lepra, e todas as persoas do curso comezaron a elaboralas artesanalmente. Naceu así o espazo «Maiores solidarios» que continuou colaborando con outras iniciativas. No obradoiro solidario elaboran mandís, complementos de lá, traballos en patchwork, marcapáxinas, bolsos, bolsas de compra feitas con paraugas reciclados, gorros, chales, chaveiros... cuxa recadación pola súa venda destinan á Cociña Económica de Ferrol desde o 2006. Durante estes anos levan recadados máis de 60.000 euros e actualmente participan 23 persoas de entre 65 e 97 anos, coordinadas por Ana Vila.
Esta actividade ten como finalidade o desenvolvemento de hábitos de reciclaxe e promove a creatividade e a imaxinación á vez que fomenta a solidariedade e a cooperación entre os participantes. Está enmarcada dentro do programa «O valor da experiencia» da Área de Maiores, que ten como obxectivo potenciar o papel activo dos maiores na sociedade e o desenvolvemento de actividades de voluntariado.