O conxunto de cámara pontevedrés Camerata Arven interpretará mañá no Auditorio de Afundación senllas composicións de Mozart
. Poucas semanas antes de morrer, Wolfgang Amadeus Mozart (1756 – 1791) escribiu o Concerto para clarinete e orquestra en La maior K622. Dezasete anos antes, cando logo dunha frenética etapa de viaxes e concertos volvera instalarse na súa cidade natal Salzburgo (Austria), na que naceu, escribira a Sinfonía n 29 en La maior, K 201. O conxunto de cámara pontevedrés Camerata Arven interpretará ambas as pezas no concerto que ofrecerá mañá ás 20.30 h no Auditorio da Sede de Afundación en Pontevedra. As entradas están dispoñibles en Ataquilla.com.
No concerto, organizado en colaboración coa Sociedad Filarmónica de Pontevedra, actuará como director e solista o clarinetista Francisco Javier Morgade. Tamén clarinete solista da Orquestra Sinfónica de Pontevedra, Morgade é ademais membro fundador da Camerata Arven, unha formación integrada por músicos afincados na cidade e a súa área de influencia e que traballa no fomento do interese pola música de cámara. Camerata Arven explora, redescubre e difunde as grandes obras da música de cámara.
Programa do concerto
A sesión musical do mércores 20 de maio comezará co Concerto para clarinete e orquestra en La maior, K 622 de Mozart. Asegura o programa do concerto que a obra recolle parte dese sabor a traxedia anticipada que embargaba ao músico. «Estamos ante unha das músicas máis enigmáticas e melodiosas que xamais se compuxeron», defenden dende a Sociedad Filarmónica de Pontevedra. A composición volveu ser amplamente escoitada a finais do século pasado alén dos circuítos da música culta ao formar parte central da banda sonora orixinal da película Memorias de África.
A segunda das pezas que soarán no concerto é a Sinfonía n 29 en La maior, K 201, escrita por Mozart cando tiña 18 anos, regresou a Salzburgo, e foi designado mestre de concertos da corte da cidade austríaca. Trátase dunha composición para cordas, dous óboes e dúas trompas. Aínda que salpican a partitura pasaxes algo sombríos, o espírito xeral da obra alíñase coas características habituais de proporción, mesura, bonhomía e frescura da música galante.
«Cultura por alimentos»
O concerto de Camerata Arven forma parte do programa «Cultura por alimentos», que Afundación leva a cabo en colaboración coa Federación Española de Bancos de Alimentos (Fesbal). Os asistentes á sesión musical poderán entregar alimentos non perecedoiros no acceso á sede de Afundación en Pontevedra para a súa distribución entre persoas e familias en risco de exclusión da cidade e a súa zona de influencia.
Hai unha imaxe de Camerata Arven nesta ligazón