O ciclo «Educación S. XXI» programa na Sede de Afundación de Pontevedra a conferencia «Entendendo, de verdade, o autismo»
Desde hai máis de 20 anos, o psicólogo Daniel Millán dedica a súa actividade ao Trastorno do Espectro Autista (TEA). Converteu o seu coñecemento, e a súa experiencia, en libros como É autista, e agora que? (2024), ou a Guía Autista – Consellos para sobrevivir no tolo mundo dos neurotípicos (2021). O próximo 11 de novembro departirá no Auditorio da Sede de Afundación en Pontevedra sobre como comprender e afrontar o TEA. A conferencia, que forma parte do ciclo «Educación S. XXI», é de acceso libre, pero baixo reserva previa en Ataquilla.com.
O título da charla é Entendendo, de verdade, o autismo. Nas súas conferencias, Millán axuda ás persoas asistentes a penetrarse e comprender con maior profundidade o mundo do Trastorno do Espectro Autista (TEA), compartindo a súa experiencia e divulgando a rica e chea de matices realidade do autismo.
Psicólogo e divulgador
Daniel Millán López, licenciado en Psicoloxía Clínica e da Saúde pola Universidade Complutense de Madrid, comezou a traballar co TEA a través da Asociación de Padres de Niños Autistas (APNA) e no gabinete de diagnóstico DELETREA. Durante máis de tres anos, foi o director xeral e máximo responsable técnico daAsociación de Padres de Niños Autistas de Badajoz. Actualmente, traballa facendo terapia e diagnósticos para persoas de todo o mundo. En 2025 publicou o libro Tengo una chispa en la cabeza.
A conferencia Entendendo, de verdade, o autismo é unha das actividades programadas neste outono en toda Galicia por «Educación S. XXI», unha iniciativa que Afundación desenvolve desde 2016. As actividades de «Educación S. XXI» están orientadas a reflexionar sobre o labor e os retos que se atopan a comunidade estudiantil, as familias, e o persoal docente na educación actual.
«Cultura por alimentos»
As actividades do ciclo «Educación S. XXI» teñen carácter gratuíto, pero ao formaren parte do programa «Cultura por Alimentos» son tamén unha canle para a recolección de comida que será distribuída entre familias en risco de exclusión. «Cultura por Alimentos» é un programa desenvolvido por Afundación e a Federación Española de Bancos de Alimentos (FESBAL). Na sede de Afundación hai contedores para a recolección das doazóns. Os asistentes poderán depositar alí alimentos non perecedoiros. FESBAL encargarase da distribución en Pontevedra e a súa área de influencia.
Imaxes de Daniel Millán, nesta ligazón