O Auditorio do Teatro Afundación acolle o 28 de maio o terceiro encontro galego de asociacións de pacientes con cardiopatías
O Teatro Afundación de Vigo será escenario, o xoves 28 de maio, do Terceiro Encontro Galego de Asociacións de Pacientes con Cardiopatías. O evento reunirá a profesionais sanitarios, asociacións de persoas que padecen diferentes cardiopatías, administracións e cidadanía. Abordarán temas coma o papel das asociacións, e o auto-coidado. Ademais, haberá diferentes obradoiros. O Terceiro Encontro Galego de Asociacións de Pacientes con Cardiopatías celebrarase en horario de tarde no Auditorio do Teatro Afundación, das 16:00 ás 20:00 horas, e a asistencia é de balde ata completar capacidade.
O programa inclúe formación en reanimación cardiopulmonar (RCP) e uso de desfibriladores, sesións sobre hábitos saudables en todas as idades, control da tensión e abandono do tabaco, así como un obradoiro de alimentación cardiosaudable. Entre o persoal sanitario que participará, ademais de especialistas en cardioloxía, haberá especialistas en materias coma nutrición, psicoloxía, fisioterapia ou enfermería. A cociñeira Lucía Abreu impartirá o obradoiro adicado á cociña.
As asociacións, presentes
Catro asociacións galegas de pacientes con diferentes cardiopatías participan no encontro. A súa intervención, no conversatorio titulado «Importancia das asociacións de pacientes con enfermidade cardiovascular», será a primeira das actividades. Estarán presentes representantes de primeiro nivel da Organización de Asociaciones de Pacientes de la Sociedad Española del Corazón, da Asociación de Cardiópatas Galicia Sur, da Asociación Española de Miocardiopatía Hipertrófica e máis da Asociación Amicor - Amigos del Corazón.
A Organización Mundial da Saúde (OMS) considera ás asociacións de pacientes como actores fundamentais e indispensables na transformación dos sistemas sanitarios modernos. De aí a importancia deste tipo de eventos. O Terceiro Encontro Galego de Asociacións de Pacientes con Cardiopatías está organizado pola Sociedade Galega de Cardioloxía, a Fundación Española del Corazón e a Unidade de Rehabilitación Cardíaca do Servizo de Cardioloxía do Hospital Álvaro Cunqueiro. Conta co apoio de Afundación, a Obra Social de ABANCA, e da empresa lucense Apetéceme.
O encontro está dirixido a todos os públicos, tanto a pacientes e familiares coma a calquera persoa interesada na prevención do risco cardiovascular.
O programa completo está na web da Fundación Española del Corazón