«Educación Século XXI» aborda na Sede de Afundación de Vigo o uso responsable, crítico e consciente da Intelixencia Artificial n

«Educar en Intelixencia Artificial hoxe é educar en autonomía, responsabilidade e futuro». Esa é unha das ideas que o catedrático da Universidade da Coruña, Francisco Bellas, trasladará o martes 17 de marzo a escolares, docentes e familias no auditorio da Sede de Afundación en Vigo. O título da actividade  é: «¿IA en educación? Si, pero con cabeza: aprender a usala sen perder o control». O evento é parte do ciclo «Educación Século XXI», o programa da Obra Social de ABANCA dedicado á reflexión e a divulgación de coñecemento para a comunidade escolar. O 17 de marzo, Francisco Bellas manterá a las 11.00 h un encontro con escolares e docentes de Vigo e a súa área de influencia. Xa pola tarde, ás 19 horas, impartirá unha conferencia aberta. A asistencia é de balde previo rexistro en Ataquilla.com.

Francisco Bellas é catedrático en Ciencias da Computación e Tecnoloxías da Información. Dende hai 25 anos, investiga a aplicación da IA a diferentes campos da enxeñería ademais de impartir materias relacionadas coa aprendizaxe automática e a robótica autónoma. Autor de máis de 40 artigos publicados en revistas indexadas e de máis de 100 contribucións a congresos internacionais e capítulos de libro, nos últimos anos focaliza os seus estudos en campos relacionados educación. Asesora sobre alfabetización en IA a institucións coma a Xunta, o Consello de Europa, a UNESCO ou a Universidade de Catar.

Lonxe de prohibicións

Nos seus encontros coa comunidade educativa na Sede de Afundación en Vigo, Francisco Bellas proporá a alfabetización en Intelixencia Artificial como a chave para un uso responsable, crítico e consciente das novas ferramentas dixitais. Disertará sobre cuestións como que se pode e que non se pode facer co IA, cales son os seus riscos, ou como utilizala sen delegar o pensamento nin a aprendizaxe. Defende, Francisco Bellas, que lonxe de prohibicións ou medos, hai que formar usuarios capaces de tomar decisións informadas, manter o control sobre a tecnoloxía e aproveitala como apoio á aprendizaxe, non coma ferramenta de substitución.

Logo de 25 anos traballando con esta tecnoloxía, o conferenciante cre que a sociedade, e tamén a comunidade educativa, están nunha fase de transición, de adaptación a este tipo de computación. Así o explica con frecuencia nas súas disertacións. Nun encontro celebrado o pasado ano con estudantes de secundaria en Santiago de Compostela, referíase aos beneficios que pode traer a IA. Pero tamén aos seus riscos: «O principal perigo é que a Intelixencia Artificial faga as cousas que tedes que facer vós», sinalaba. E defendía a formación nesta tecnoloxía, tanto do alumnado como do profesorado, para aproveitar as súas vantaxes. 

A conferencia de Francisco Bellas é unha das tres programadas neste semestre polo ciclo «Educación Século XXI». Todas versan sobre os retos que supón a irrupción da IA en relación cos menores, a súa a utilidade e os seus riscos como ferramenta educativa, e os retos que formula coma fenómeno social.

O ciclo «Educación Século XXI» é un punto de encontro para a reflexión e a divulgación de coñecemento para a comunidade escolar. As presentacións que organiza son case sempre en dobre sesión: unha matinal só para centros educativos, á que asisten alumnado e profesorado, e outra para o público xeral.

«Cultura por alimentos»

As actividades do ciclo «Educación Século XXI» forman parte do programa «Cultura por Alimentos», de Afundación e a Federación Española de Bancos de Alimentos (FESBAL). Na sede de Afundación hai contedores para a recolección de doazóns de alimentos que FESBAL e encargará de distribuír en Vigo e a súa área de influencia.

Hai imaxes de Francisco Bellas nesta ligazón