O Centro de FP de Afundación da Coruña pecha o seu período de matrícula con lista de agarda

O Centro de Formación Profesional de Afundación na Coruña, situado na rúa Ribadavia, 4, comezará en setembro un novo curso académico das catro titulacións que nel se imparten: Administración e finanzas, Asistencia á dirección, Desenvolvemento de aplicacións multiplataforma e Desenvolvemento de aplicacións web. Todas as prazas deste catro ciclos están xa cubertas e con lista de agarda, e contan cunha demanda especialmente significativa nas titulacións relacionadas coa informática, como as de Desenvolvemento de aplicacións multiplataforma e Desenvolvemento de aplicacións web, sendo esta a última en incorporarse á oferta académica e que implantará o segundo curso neste novo que comeza.

O grao de empregabilidade dos ciclos durante o pasado curso foi bo. 93 estudantes tiveron a oportunidade de completar a súa formación con prácticas en centros de traballo grazas á colaboración de 68 empresas, das que o 90% realizaron unha moi boa valoración dos estudantes en prácticas.

No marco da promoción do coñecemento como un dos motores fundamentais para o pleno desenvolvemento social, Afundación, a Obra Social de ABANCA, incorporou ao seu modelo de educación superior orientado á empresa a divulgación da investigación e da experiencia práctica nos diferentes sectores produtivos. Para iso conta con centros coma este, cuxas actividades se desenvolven ao redor deste ámbito académico que, tras adquirir unha gran capacidade de adaptación aos diversos plans educativos implantados ao longo das últimas décadas, están redirixidos a destacar os seus valores de orientación ao mercado laboral.