Cafés Candelas inaugura a sexta edición de «Empresa familiar nas aulas», de AGEF e Afundación

A torrefactora lucense Cafés Candeas inaugurou   hoxe, cunha charla do seu xerente, Ramón Alonso, no colexio Divino Maestro de Lugo, a sexta edición do programa educativo «Empresa familiar nas aulas», que impulsan a Asociación Galega da Empresa Familiar (AGEF) e Afundación, a Obra Social de ABANCA.

Está previsto, ademais, que o alumnado realice o próximo 16 de xaneiro unha visita guiada ás instalacións de Cafés Candelas, no Polígono Industrial do Ceao de Lugo.

Imaxes dispoñibles AQUÍ

Mil alumnos de 23 institutos e 23 empresas familiares

A iniciativa «Empresa familiar nas aulas» aspira a espertar vocacións emprendedoras e novos horizontes laborais entre os estudantes mediante charlas, talleres prácticos de emprendemento e visitas a empresas. Cada edición do programa finaliza coa convocatoria do concurso «Emprender é soñar, apúntaste?», que premia os mellores proxectos empresariais como estímulo motivacional para os alumnos participantes.

Nesta sexta edición participarán preto de mil alumnos de ESO, Bacharelato e Formación Profesional de 23 institutos das catro provincias galegas, que se unirán aos máis de 3.700 alumnos de 45 centros educativos galegos que xa formaron parte desta experiencia desde a súa posta en marcha en 2021.

Así mesmo, directivos de 23 das empresas familiares máis destacadas de Galicia (Aceites Abril, Altia, Aluman, Aluminios Cortizo, Babé e Cia, Cafés Candelas, Congalsa, Espina y Delfín, Galuresa, Grupo Aresa, Grupo Lence, Grupo Nogar, Grupo Pereira, Grupo Pérez Rumbao, Grupo Revi, Grupo Zendal, Inasus, Jealsa, Kaleido, Lodiel, Nauterra, Nortempo e Terras Gauda) serán os encargados de impartir as charlas nos centros educativos galegos, coa finalidade de promover o emprendemento e sensibilizar ao alumnado sobre a importancia e valores das empresas familiares.

«Con este programa educativo queremos contribuír a reforzar a cultura emprendedora nas novas xeracións, visibilizando o papel estratéxico das empresas familiares en Galicia e transmitindo valores esenciais como a colaboración, o esforzo, a responsabilidade e o arraigamento ao territorio. Educar con exemplos reais e da contorna axuda a enriquecer a formación empresarial dos alumnos e a espertar novas vocacións nas aulas que serán esenciais para construír o futuro de Galicia», comentou José Bernardo Silveira, presidente de AGEF.

Pedro Otero, director xerente de Afundación, sinalou que o programa de Empresa Familiar nas aulas «intégrase nas accións educativas de Afundación, orientadas a facilitar un achegamento, xa desde idades temperás, a un ámbito empresarial tan relevante para o ecosistema galego como o familiar. Deste xeito, contribuímos a fomentar unha comprensión máis profunda da contorna laboral coa que se atoparán no futuro, á vez que se enriquece a súa aprendizaxe sobre a realidade empresarial».

Para Antía López, titora e profesora de Formación Profesional do colexio lucense Divino Maestro, «a charla e a visita ás instalacións de Cafés Candelas son unha aprendizaxe moi práctica e complementario cos contidos que vemos en clase a diario. Non hai mellor maneira de aprender o que é unha empresa que escoitando aos seus profesionais e vendo in situ como funciona. Na actualidade, os alumnos teñen toda a información a golpe de clic, e aínda que lles orientamos con formación práctica, esta experiencia axúdalles a aprender o que se van a atopar no mundo laboral».

Sobre AGEF

A Asociación Galega da Empresa Familiar (AGEF) é a principal asociación de empresas con raíces, sede social e vocación de permanencia en Galicia, integrada na actualidade por 63 compañías. O seu propósito é promover o desenvolvemento e crecemento das empresas familiares na nosa comunidade, defendendo os seus dereitos e intereses e apoiando iniciativas que as fagan máis competitivas, co obxecto de favorecer o incremento da prosperidade e calidade de vida de Galicia.