ABANCA e Afundación repartiron durante as vacacións 80.000 menús a menores en risco de pobreza
O programa «Cubertos», impulsado por ABANCA e a súa Obra Social, Afundación, en colaboración con concellos e entidades sociais co obxectivo de garantir unha alimentación saudable durante as vacacións escolares a menores en risco de pobreza ou exclusión social, finaliza a súa actividade. Grazas a este proxecto, desde o pasado mes de xullo puidéronse repartir preto de 80.000 menús, 1.650 ao día de luns a venres, nas sete principais cidades galegas.
Para o correcto desenvolvemento deste programa de apoio social foi imprescindible o labor dos 100 membros do equipo da Obra Social de ABANCA e os 120 voluntarios e voluntarias tanto de ABANCA como de Afundación que se encargaron de preparar a distribución, entregar os menús e atender ás familias. Para eles este programa supuxo «un achegamento á realidade de moitas familias que o están pasando moi mal. Esta experiencia fainos reflexionar e ser conscientes do afortunados que somos algúns -comentan- , así como ser partícipes activamente na sociedade, cubrindo un oco que estaba sen atender». Ademais do propio servizo, os usuarios de «Cubertos» subliñan a proximidade e calidez no trato recibido ao longo do programa.
Os menús distribuíronse na Coruña, Lugo, Ourense, Pontevedra, Santiago, Vigo e Ferrol en colaboración coas administracións locais e distintas entidades sociais, segundo cada municipio. Para iso, habilitáronse un total de 22 puntos de recollida, para facilitar a accesibilidade das familias con localizacións adecuadas ás súas necesidades.
ABANCA e Afundación impulsan este programa dentro do seu compromiso coas persoas máis vulnerables, conscientes de que o impacto provocado polo coronavirus esixe unha resposta rápida e coordinada para facer fronte ás necesidades inmediatas de quen máis o precisa. Ambas as entidades secundan o obxectivo común das administracións e entidades de iniciativa social de mobilizar a solidariedade cidadá e das empresas, fomentando ademais o voluntariado e a responsabilidade compartida na construción dunha sociedade máis xusta e cohesionada.
A crise sanitaria provocada pola COVID-19 agravou os niveis de pobreza da infancia en España que entidades do terceiro sector como UNICEF, Cáritas ou_Save the children_ situaban xa antes da pandemia en niveis alarmantes. Neste contexto, no que se fai imprescindible ampliar os programas de protección social tanto públicos como privados, ABANCA e Afundación puxeron en marcha o programa «Cubertos».
Menús saudables
Conscientes de que unha correcta alimentación é esencial para a saúde das persoas, máxime no caso das nenas e nenos que se atopan en fase de crecemento, os menús do programa «Cubertos» elabóranse seguindo as recomendacións da Estratexia NAVES da Axencia Española de Seguridade Alimentaria e Nutrición (AESAN), que engloba accións para inculcar hábitos de vida saudables a través da alimentación e o exercicio.
Con este obxectivo, os menús, preparados en empresas galegas especializadas e supervisados por nutricionistas, son equilibrados e orientados á idade e gustos dos menores e elabóranse con produtos frescos de provedores locais. Así mesmo, na preparación dos menús atendeuse ás necesidades específicas dos nenos e nenas participantes con intolerancias, alerxias ou outras particularidades.