Afundación e Special Olympics Galicia presentan en Pontevedra o Festival de Artes Escénicas 2025

Afundación, a Obra Social de ABANCA, e Special Olympics Galicia desenvolven, unha edición máis, o Festival de Artes Escénicas Special Olympics coa representación de Clownsics da Asociación con ELES na Sede Afundación Pontevedra o 19 de novembro ás 18.00 h. As entradas, gratuítas, están dispoñibles na web Ataquilla.com.

Estreada no Festaclown Vilagarcía 2025, en Clownsics, os actores e actrices do grupo de teatro da Asociación CON ELES visitan o marabilloso universo da música clásica en colaboración coas compañías Clámide Teatro e Artefeito Producións.

Clownsics é un divertimento que combina temas en directo con rigorosos play - backs, unha montaxe cómica que combina música, teatro, humor e mucho ritmo co mundo das partituras de fondo. Neste espectáculo, dirixido por Fran Rei e de creación colectiva, conviven pezas musicais clásicas de compositores como Khachaturian, Mozart, Beethoven ou Rossini e divertidas rutinas teatrais.