Afundación e Matia Instituto promoven unhas xornadas en Vigo para repensar o envellecemento

Nun contexto de crecente lonxevidade, o reto actual non consiste en vivir máis anos senón en facelo con benestar, propósito e sentido. Partindo desta perspectiva, Afundación promove o vindeiro luns 16 de marzo na súa Sede de Vigo as II Xornadas «Coñecendo as emocións», un foro para repensar o envellecemento desde unha mirada positiva que, sen ignorar as perdas e desafíos vitais propios desta etapa, poña en valor as fortalezas necesarias para afrontalos, adaptarse aos mesmos e seguir construíndo unha vida con sentido.  O encontro, que se celebrará de 10.00 a 14.00 h, está dirixido a profesionais e estudantes dos ámbitos social e sanitario, entidades do sector e público xeral.

A iniciativa enmárcase no programa «Coñecendo as emocións», que Afundación impulsa desde 2017 en colaboración con Matia Instituto, e que ten como obxectivo incorporar a dimensión emocional como un eixo estratéxico na forma de abordar o envellecemento e o benestar na vellez.

María Teresa Sancho, directora xeral do IMSERSO, unha das maiores expertas sobre envellecemento a nivel internacional e recoñecida por Nacións Unidas como unha das 50 líderes mundiais que máis contribuíron a transformar a sociedade para envellecer mellor, abordará na conferencia inaugural das xornadas o marco estratéxico europeo para un bo envellecemento: «Envellecer é vivir».

A filósofa e catedrática de Humanismo e resiliencia social Anja Machielse, pronunciará a conferencia marco «Envellecemento significativo e resiliencia: claves para o benestar emocional na vellez». As súas achegas cuestionan os modelos normativos do envellecemento activo e demostran que o sentido da vellez non depende de grandes proxectos nin de estar permanentemente activo senón de ter vínculos significativos, da identidade, da continuidade vital e da validación emocional.

Na segunda parte da xornada presentaranse os resultados e experiencias da rede do programa da Obra Social de ABANCA «Coñecendo as emocións». Será en dúas mesas redondas nas que estarán tanto persoas participantes no programa, como profesionais e investigadores de Afundación, Matia Instituto, e de entidades sociais e de coidados que integran a rede.

UNHA REDE EN TORNO AO BENESTAR EMOCIONAL

Afundación e Matia impulsaron cos seus programas de benestar emocional unha rede integrada hoxe por 16 organizacións que implementaron o proxecto en 26 localidades de Galicia e Madrid, coa participación ata o momento de máis de 1200 persoas.  O propósito desta rede é compartir aprendizaxes, metodoloxías e poñer en común o coñecemento do conxunto de profesionais  que participan na mesma para xerar propostas que contribúan á mellora do benestar emocional a medida que envellecemos.

A experiencia acumulada ao longo destes anos e, especialmente, os testemuños das persoas participantes, mostraron que traballar as competencias emocionais non só contribúe a comprender e xestionar mellor as emocións, senón que tamén favorece procesos vinculados cun envellecemento máis significativo.  «Escoitando ás persoas implicadas e os relatos sobre o que representa para elas a participación no programa, detectamos que nos din algo que vai moito máis alá da comprensión ou regulación emocional. Fálannos de experiencias propias vinculadas a un envellecemento significativo.», destaca Sara Marsillas, investigadora de Matia Instituto,

«Xerar espazos seguros onde compartir emocións, expresalas sen xuízo, validalas e sentir que a propia experiencia é comprendida e valorada, contribúe a fortalecer os vínculos cos demais e a reforzar o sentido que cada persoa dá á súa propia vida», engade Sabela Couceiro, coordinadora da área de Maiores de Afundación.

Imaxes AQUÍ