Afundación reanuda «Educación século XXI» centrado na saúde emocional e física, e na nutrición como base para ambas

Afundación renovará o 30 de setembro o seu ciclo de conferencias «Educación século XXI», unha referencia para a comunidade educativa. O programa ten como obxectivo, partindo da importancia dunha educación asentada en valores, proporcionar tanto aos docentes como ás nenas e nenos e ás súas familias, técnicas, mecanismos e estratexias que favorezan a convivencia na contorna escolar. A necesidade de consolidar un marco de educación asentado na ética, a inclusión e o apoio recíproco de toda a comunidade educativa é un dos principios que se seguen nas actividades didácticas desenvolvidas en Afundación. A través de «Educación século XXI», a Obra Social de ABANCA pretende atender e dar resposta ás principais inquietudes presentes na comunidade educativa da man das propostas de figuras de referencia en ámbitos como a pedagoxía, a psicoloxía, a filosofía, o dereito ou a medicina.

Por tanto, nesta nova edición do programa continúanse abordando algunhas das casuísticas de maior interese por parte das diferentes partes integradoras da comunidade educativa. Así, nesta ocasión ponse o foco na saúde nas súas diferentes dimensións: a emocional, a física e a nutricional como base para o correcto desenvolvemento das dúas primeiras.

As inscricións para público escolar pódense tramitar aquí e as de público adulto, proximamente en Ataquilla.com.

As imaxes están dispoñibles aquí.

Conferencias para público escolar e adulto

A conferencia inaugural da nova edición deste ciclo terá lugar o próximo 30 de setembro na Sede Afundación de Pontevedra ás 11.00 h para público escolar, como anticipo do foco na saúde física e emocional que engloba o mes de outubro.

En «O impacto da arte no benestar emocional», Ferrer i Balsebre compartirá a súa visión sobre a importancia das artes como poderosa ferramenta para canalizar e expresar as emocións, resaltando como a creatividade pode ser un camiño enriquecedor para o benestar emocional e a saúde mental. Unha reflexión que convida a valorar a arte non só como expresión, senón tamén como unha vía para o equilibrio interior.

O 20 de outubro, no Auditorio do Teatro Afundación Vigo, ás 11.00 h para escolares e ás 18.30 h para público xeral, terá lugar a conferencia de Boticaria García «O meu cerebro ten fame». Na súa intervención, salientará a importancia fundamental da alimentación para manter e promover a saúde mental, resaltando como unha dieta equilibrada pode ser un piar clave no noso benestar emocional e psicolóxico. Este enfoque integral convídanos a reconsiderar a relación entre o que consumimos e o noso estado mental, promovendo hábitos que beneficien tanto o noso corpo como a nosa mente.

O 30 de outubro, para escolares ás 11.00 e para público adulto ás 19.00 h, a Sede Afundación A Coruña acollerá a conferencia «Insatisfacción xuvenil coa imaxe corporal, cirurxía?», na que Francisco Martelo abordará o complexo mundo das presións relacionadas coa imaxe en adolescentes, reflexionando sobre a problemática da dismorfia corporal e o seu impacto na autoestima e o benestar dos máis novos.

O 11 de novembro, no marco do mes dedicado á neurodiversidade, a Sede Afundación Pontevedra acollerá dúas conferencias, no horario das anteriores, a cargo de Daniel Millán, psicólogo especializado en autismo, que nos axudará a mergullar e comprender con maior profundidade o mundo do Trastorno do Espectro Autista (TEA), compartindo a súa experiencia e achegándonos a unha realidade chea de matices e riqueza, grazas á súa charla «Entendendo de verdade o autismo».

O 18 de novembro, o Auditorio ABANCA de Santiago de Compostela abrirá as súas portas para público escolar ás 11.00, e xeneral ás 19.00 h, para abordar o TDAH ao longo da vida con María del Pilar de Castro Manglano, psiquiatra especializada en adolescentes, que nos guiará para descubrir e comprender en profundidade o universo TDAH, achegando a súa experiencia e compromiso na problemática da infancia e a mocidade.

Esta nova edición de «Educación século XXI» está incluída no programa «Cultura por alimentos», mediante o cal Afundación, en colaboración con FESBAL, anima á doazón de produtos non perecedoiros a modo de entrada solidaria, que se poderán depositar nos contedores habilitados para o efecto nos espazos de Afundación, para a súa posterior doazón ao banco de alimentos local.