Afundación promove un ciclo de conferencias sobre IA impartidas por un voluntario sénior do seu Espazo +60

Chámase Pedro Díaz Ferreiro. Entre os logros que tivo na súa carreira profesional está o de haber sido o director comercial da primeira franquía da desaparecida empresa Airtel en España. Hoxe é unha das persoas socias dos Espazos +60 de Afundación, e durante este mes impartirá formación sobre intelixencia artificial (IA) aos seus compañeiros dos Espazos +60 e a quen queira asistir.

As formacións permitirán ás persoas asistentes saber máis sobre o momento actual da IA, e mellorar coñecementos, ou aprender desde cero, sobre o uso de algunhas ferramentas. Díaz Ferreiro impartirá un total de 3 charlas na serie de conferencias «A revolución da intelixencia artificial». Celebraranse os días 13, 20 e 27 de abril ás 19 horas no Espazo +60 de Afundación en Santiago (Carreira do Conde, 18). A actividade é de carácter gratuíto, previa inscrición telefónica (981 580 385) ou directamente, e con anterioridade, na propia sede das charlas.

Persoas maiores coma divulgadoras tecnolóxicas

O enfoque da serie de conferencias «A revolución da intelixencia artificial» vai máis alá da difusión do coñecemento. Tamén ten o obxectivo de poñer en valor a experiencia e capacidade das persoas maiores como divulgadoras tecnolóxicas.

Esta actividade está vencellada a senllos proxectos de Afundación: un deles, denominado «O valor da experiencia», ten como finalidade potenciar o papel activo das persoas maiores na sociedade e favorecer o desenvolvemento de accións interxeracionais e de voluntariado. O obxectivo do outro proxecto, «Igualdade Dixital», presentado o pasado 24 de marzo, é apoiar a mellora das competencias tecnolóxicas das persoas de máis de 60 anos.

Os temas

A primeira das conferencias de Pedro Díaz Ferreiro titúlase A revolución silenciosa da IA. Referirase a DeepSeek e o Proxecto Stargate, dous fitos tecnolóxicos distintos, un de China e o outro de EE.UU, que representan a actual guerra fría da IA.

A sesión do 20 de abril leva por título Deep Research (Pensamento profundo). Gemini Live. Na terceira xornada, a do luns 27 de abril, as persoas asistentes aprenderán a xerar imaxes, a converter bosquexos en infografías ou a crear cómics, con ferramentas de IA a través de textos.

«Igualdade Dixital»

As conferencias de Santiago tiveron un antecedente en Ferrol o pasado 30 de marzo. No Espazo +60 da cidade departamental, o escritor e experto en TICs Florentino Blas Fernández Cueto impartiu o obradoiro Como convivir coa IA de forma segura.

Tanto esa actividade como as de Santiago forman parte das 83 accións gratuítas que Afundación celebra nos meses de abril e maio en 11 localidades de toda Galicia. Na rede de Espazos +60 de Afundación haberá un total de 88 cursos de 1,5 horas cada un, neses dous meses, para a formación en competencias dixitais.

«Igualdade Dixital» constrúese arredor dunha plataforma web de formación en liña sobre o uso seguro de móbiles e as súas aplicacións. Está pensada tanto para a autoformación como para servir de apoio a proxectos formativos e para o seu uso por formadores ou mentores dixitais. Ten por obxectivo dinamizar o proceso de adquisición de competencias dixitais das persoas maiores de 60 anos.

Hai imaxes de arquivo de actividades relacionadas nesta ligazón